"Amerıka Qurama Shtattary Taıvannyń qorǵanys aımaǵyna Qytaıdyń jasaǵan eń iri áýe shabýylyn aıyptady" dep habarlady Ál Jazıra telearnasy. Vashıngton Beıjińniń bul áreketin "arandatýshylyq" dep sıpattady.

AQSH Memlekettik departamentiniń ókili Ned Praıs Qytaıdyń "Taıvanǵa qarsy áskerı, dıplomatıalyq jáne ekonomıkalyq qysym men májbúrleýin" toqtatýǵa shaqyrdy.

"Qytaı Halyq Respýblıkasynyń Taıvan mańyndaǵy arandatýshylyq áskerı áreketi Amerıka Qurama Shtattaryn qatty alańdatady, bul aımaqtyq beıbitshilik pen turaqtylyqqa nuqsan keltiredi" delingen Praıstyń habarlamasynda.

Senbi kúni Qytaıdyń 39 soǵys ushaǵy Taıvan áýe aımaǵyna kirgen. Beıjiń óziniń Ulttyq kúnin 38 áskerı ushaqpen atap ótken. Onyń ishinde ıadrolyq "H-6" bombalaýshylary da bar.

Taıvan qytaılyq ushaqtarǵa eskertý jasaý úshin jaýyngerlik ushaqtaryn jiberip, zymyran júıelerin ázirlikke qoıǵan.