Depýtat Maqsat Tolyqbaı elimizdegi temir jol máselesin kóterdi. Ol qazirgi vagondardyń sapasyn synǵa alyp, mınıstrge saýal joldady. 

"Sovet zamanyndaǵy vagondar súıretilip áli júr. Sapa bolsa nól. 60 paıyzynyń toz-tozy shyqqan. Mınıstrlik ne deıdi? 2030 jylǵa deıin jarylqaımyz deıdi. Biraq bizdiń QTJ-ǵa báribir. Sol jerdegi menedjerlerge bizdiń temir jol sapasynyń quny kók tıyn. 26 jylda jarylqaı almaǵan salany 7 jylda jarylqaıdy degenge jan balasy senbeıdi. Aıtatyndary ertegi, aıtatyndary ańyz. Qalǵan vagondardyń 80 paıyzy tozyp, eki qolymyzdy murnymyzǵa tyǵyp otyrmasymyzǵa kepildik bere alasyz ba mınıstr myrza?", dedi Maqsat Tolqybaı.

Budan bólek depýtat temir joldaǵy bılet baǵasyna qatysty da óz pikirin aıtty. 

"Terezesi ashylmaıtyn, kondısıonerleri istemeıtin, qabyrǵasynda tarakandar júretin eski vagondardyń ózine jazdy kúni bılet tappaısyń. Bılet baǵalary qymbat. Alaıda biz bıletterdi sýbsıdıalaý úshin jyl saıyn mıllıardtardy sanap beremiz. Poıyzdardyń keshigip júretinin aıtpaı-aq qoıaıyn. Toqeteri mynaý: Eski Qazaqstannyń murasy bolyp qalǵan.temir jol máselesin qashan sheshesizder? 26 jyl kúttik. Áli qansha kútemiz? Zamanaýı vagondarǵa kezeksiz, tıimdi baǵada minetin kún týa ma bul qazaqqa?", dedi Maqsat Tolyqbaı.