Денсаулық сақтау министрі С. Қайырбекова, 

Алматы қалалық денсаулық сақтау басқармасы назарына!

    Еліміз тәуелсіздік алғалы жиырма жылдан астам уақыт өтті. Аз ба,  көп пе, бірақ тарихтың қатпарына кеткен КСРО-ның сарқыншақтарын тазартатын уақыт әлдеқашан жеткен секілді еді. Алайда, бұл  «жаңалық» еліміздегі  ең беделді оқу  ордасы ҚазҰУ-ды айналып өткендей. Себебі, ҚазҰУ студенттер емханасының мөрінде  әлі күнге  дейін  ҚазССР деген  жазу тұр. Нақтырақ  айтқанда, тәуелсіздіктің 23 жылында мөр ауыстырылмаған. Және  осы уақытқа дейін бұл мәселеге немқұрайлы қарап келе  жатыр. Бұл туралы университет студенті Асылзат Алтай:  «Бұл мәселе студенттер арасында осыдан бір-екі жыл бұрын да көтеріліп жабулы қазан жабулы күйінде қалған болатын. Осындай немқұрайлыққа жол беріп отырған мекеменің ғана емес, бәріміздің де кінәміз бар. Ал оқу орны тұрғысынан алғанда, мұндай сорақылық елдегі көсбасшы оқу орны деген атына сын. Екінші жағынан осының астарынада белгілі бір жымысқы пиғыл жатқан жоқпа деген жаман ой қылаң береді», - дейді.

    Шындап келгенде басқа мемлекетте мұндай жайттар ауыр қылмыс болып есептеледі.  Бұл Конституцияға қайшы. Ата Заңда  «Егеменді мемлекет», Қазақстан Республикасы деп тайға таңба басқандай етіп жазылған. Сонда 23 жылдан бері СССР-дің мөрін пайдаланып келген Студенттер емханасына «мұның не?»  деген ешкім табылмаған ба? Басқасын былай қойғанда, Қазақстанның жас тәлімгерлеріне, болашақ ел иелеріне денсаулық анықтамасын беретін орталықтың бұлай істеуі неден дерек береді?

 Сондықтан,   Алматы  қаласы  Денсаулық сақтау  басқармасы және ҚазҰУ басшылығына  бұл келеңсіздікті жою керектігін ескертеміз. Заңды, жариялы түрде жауап берулеріңізді сұраймыз!