Жақында ғана ерекше дауысымен, әсем әнімен әлемді тамсандырған қытай қызы интернет жұлдызыға айналған еді. Көптеген интернет басылымдар орындаушы мен әннің тарихына тоқталып, жарыса жазды. Алайда, аталмыш әннің қазақ эстрадасында да шырқалып жүргенін байқадық.
Сонымен ол қай ән?
Алдымен қытайлық Тан Жиң Жын есімді кішкентай қыздың орындауындағы "Таң атты..." әнін ұсынамыз.
Енді қазақстандық әнші Фарида Жолдасованың орындауындағы "Жаралы аққу" әнін тыңдап көріңіз.
Ұқсастық бар ма?
Енді осы кезде кім кімнен ұрлады деген сұрақтың туындауы заңдылық. Қытайлық әннің тарихына үңілсек, жоғарыдағы "Таң атты..." әні 1999 жылы қайғылы оқиғаға байланысты Хан Хоң есімді композитордың жүрегінен шыққан екен. Сол себепті қазақстандық орындаушы Фарида Жолдасованың әкесі Ұлықпан Жолдасовқа хабарласып, "Жаралы аққу" әнінің авторларын сұрадық.
-"Жаралы аққу" әнінің сөзін жазған автор есіме түспей тұр. Бірақ әні біздікі емес. Қытай әні. Бертінде ол әннің аранжировкасын қайта жасап, жазып шыққанбыз. Кейін бұл әнді Фариданың өзі жеке де, "Дауыс KZ" тобымен бірге де орындады, - деді Ұлықпан Жолдасов.
