Уолба деп аталатын якутиялық ауылдың Михаил Боппосов есімді тұрғыны ауылдастарын таң қалдырудан жалығар емес деп хабарлайды vesti.ru. Жаңа жыл күні ол Шығыс күнтізбесіне сай 2017 жылдың символы әтештің мүсінін ерекше биоматериал яғни тезектен жасап тұрғызады.

Әтештің биіктігі 3,5 метр, ал ұзындығы 4,2 метр. Якутияның аязының арқасында мүсін өз орнында берік тұр. Оған тіпті ересек адам шықса да құлап қалмақ түгілі қыңқ етпейді.  Жергілікті БАҚ  sakhalife.ru-дың айтуынша, Михаил Боппосов мұндай шығармашылықпен айналысып жатқанына бірнеше жыл болыпты. Әтешті де ол ауылдастарының өтініші бойы тұрғызыпты. Әтеш жасап жатқан кезде шебердің аяғы сынып қалған кезде ауылдастары Михаилдың тілеуін тілепті. Жұмысты бітіре алмай жатқан оған көмекке ағалары келеді. Солардың арқасында әтештің мүсіні уәде бойынша желтоқсанның 31-і күні бой көтерген. Бұған дейін Михаил 2 метрлік кобра жыланын, көсем жегілген аттарды, айдаһарды, бір қора ешкі және үстінде маймылдар отырған пальмаларды тезектен жасап шығарған.  

Михаил Боппосовтың ғаламторда жанкүйерлері де баршылық. Мысалы, Александр Беленький өз блогын якутиялық шебердің жұмыстарына арнаған екен.