Елбасы Нұрсұлтан Әбішұлы Назарбаев Қазақстан халқына биылғы Жолдауында «Отанды сүю – бабалардан мирас болған ұлы мұраны қадірлеу, оны көздің қарашығындай сақтау, өз үлесіңді қосып, дамыту және кейінгі ұрпаққа аманат етіп, табыстау деген сөз. Барша қазақстандықтардың жұмысының түпкі мәні – осы!», - деп Қазақстандық патриотизмнің жаңа үлгісін айқындап берген болатын.

Президент Жолдауындағы стратегиялық мақсат-міндеттерді насихаттау шаралары аясында Алматы технологиялық университетінде Қазақстан Республикасының Тәуелсіздік күніне арналған «Мен АТУ патриотымын» атты патриоттық шара өтті.

Шараны салтанатты түрде ашқан университеттің бірінші проректоры, профессор Бауыржан Нұрахметов: «Тәуелсіздікке қол жеткізу – іргесі қаланған әрбір мемлекеттің арманы. Қазіргі таңда ашық аспан астында бейбіт күн кешіп жатқан Сіздер мен біздер, әрине, бақыттымыз. Бұл ата-бабамыздың батырлығы мен қайсарлығының, өз еліне патриоттық сезімінің мықтылығының арқасы. Сонымен қатар, Ұлт көшбасшысы, Қазақстан Республикасының Президенті Нұрсұлтан Әбішұлы Назарбаевтың салиқалы саясатының, көрегенділігінің арқасы екенін білеміз», - деп атап өтті.

Бүгінгі тәуелсіздігімізге қол жеткізу жолында 1986 жылғы Желтоқсан көтерілісінің тарихи маңызы зор. Шараның қонақтары, Желтоқсан көтерілісіне қатысушылар – Қазақстан Жазушылар одағының мүшесі, ақын-сазгер Аманғазы Кәріпжанов пен Қазақстанның мәдениет қайраткері, ақын Болат Шарахымбай Желтоқсан көтерілісі мен Тәуелсіздік тақырыбында жастармен ой бөлісті. Болат Шарахымбай: «Біз Желтоқсан көтерілісінің куәгері ғана емес, сол оқиғаға басынан аяғына дейін қатысып, ел тәуелсіздігі үшін күрестік. Атап кету керек, бұл көтерілістің тарихи маңызы зор. Себебі сол оқиғалардан кейін халқымыздың тәуелсіздік рухы күшейді, сол кездегі Кеңестер Одағының басқа аймақтарында демократиялық жаңару процестері басталды, біртіндеп КСРО ыдырап, Қазақстан өз егемендігін алды», - деп атап көрсетті.

Тәуелсіздіктің мерейін асқақтатып, студент жастардың ел ертеңіне деген жауапкершілігін арттыруда университеттің ұлағатты оқытушы қауымының үлесі зор. Университет басшылығы атынан бірінші проректор Бауыржан Нұрахметов білімді ұрпақ тәрбиелеуде ерекше еңбек сіңірген ұстаздарға алғысын білдіріп, арнайы сыйақымен марапаттады. «Сіздердің еңбектеріңіздің арқасында тәлімгерлеріміз білім мен ғылым саласындағы жетістіктерімен туған елге деген сүйіспеншілігін дәлелдеп келеді» – деді ол.

Шара аясында Алматы технологиялық университетіндегі «НұрОтан» бастауыш партия ұйымының елуден астам қызметкеріне жаңа үлгідегі партиялық билеттер табыс етілді. Салтанатты түрде партиялық билеттерді табыстаған «НұрОтан» партиясының Алмалы аудандық филиалы Саяси кеңесінің мүшесі, университеттің тәрбие ісі жөніндегі проректоры Қалтай Батхолдин «НұрОтан» партиясының төрағасы, Ұлт көшбасшысы Нұрсұлтан Әбішұлы Назарбаевтың салиқалы саясатына әрдайым қолдау көрсетіп, Отанға деген шексіз сүйіспеншілігімізді іспен дәлелдеп, оның көркеюі жолында жұдырықтай жұмылып жұмыс істеуге шақырды.

Меркелік шара аясында университет жастары арасында байқау ұйымдастырылып, студент-жастар өз өнерлерімен отансүйгіштіктің жарқын үлгісін көрсетті.

«Қазақстан Республикасының Тұңғыш Президенті және Тәуелсіздік» тақырыбында студенттердің командалары арасында брейн-ринг ұйымдастырылып, жастар өздерінің терең білімдерін жан-жақты көрсете білді.

«Мен АТУ патриотымын» сайысының үздіктері анықталып, «Сөз шебері», «Ең үздік патриоттық ән», «Ең үздік мәтін», «Ең үздік дауыс», «Ең үздік әлеуметтік бейнеролик» номинациялары бойынша өнерлерін көрсеткен студенттер арнайы дипломдармен марапатталды.

Алматы технологиялық университетінің

ақпараттық қызмет жетекшісі

Асхат Әбішев