Қазақстандағы танымал екі саясаттанушы тоқал алу мәселесін заңдастыруға қатысты ойларымен бөлісті.

Бұл туралы anabol.kz сайты хабарлайды. Саясаттанушы Мақсат Жақау 2 немесе 4 әйел алуды заңдастыру уақыт талабы екенін айтты. "Заңдастыру дегеніміз - әйелдердің құқықтық-материалдық мүмкіндіктерге ие болуы. Өйткені, тоқал алуды заңдастырмау азаматтық жауапкершілігі анықталмаған азаматтық некенің нысанымен ғана шектеледі. Екінші мәселе, сол әйелден туылған балалары болса, олардың да толық отбасыда өмір сүруіне, баланың толық қолжетімді дүниелеріне жол ашылады", -дейді Мақсат Жақау.

Сол әйелден туылған балалары болса, олардың да толық отбасыда өмір сүруіне, тиісті баланың толық қолжетімді дүниелеріне жол ашылады.

Оның пікірінше, мұрагерлікті айтпағанның өзінде, бала әкесінің заңды баласы әрі балалық психологиялық қыспақтан ада болады. "Үшіншіден, ешқандай діни де, азаматтық-тұрмыстық қарым-қатынастық тәртіптерге қайшы келмей саналы заңды қадамдармен өмір сүруге қол жеткізеді. Сондықтан, қажеттілік туындаған жағдайда қоғамдағы отбасылық проблемалардың алдын алу үшін, қоғамдық отбасы институттарын шайқалтпау үшін де "Тоқалдықты немесе бірнеше әйел алу туралы Заңды" енгізу қажет деп санаймын. Бірақ бұның да тиісті-қажетті отбасылық туындаған кезде ғана, бәйбішесінің толық келісімімен күшіне енуі "Неке туралы келісім-шарттың" негізінде жүзеге асуы керек", - деп қорытындылады ол өз ойын.

Ал танымал саясаттанушы Айдос Сарым тоқал алуды заңдастырудың қажеті жоқтығын, тіпті, бұл мемлекет дәрежесіне көтеретіндей мәселе еместігін айтады.

"Тоқал алуды заңдастыруды қажет деп ойламаймын. Менің ойымша, ол әр адамның жеке басының немесе табиғаттың, адамгершіліктің мәселесі. Оның басқа да реттері бар, оны қоғам болып талқылауға мүлде келмейді. Мен аз да болса өмір көрген адам ретінде айтарым, ешбір ана, ешбір әйел тоқалдыққа келісім бере бермейді. Біріншіден, қоғамдық тұрғыда, менталитетімізден аттап кете алмайды. Тоталитарлық тұрғыдағы салтты ешкім бұзып кетпейді. Бұл да анық нәрсе. Бұл мәселе әр адамның жеке өміріне қатысты, оны мемлекет дәрежесіне көтеретіндей мәселе емес деп ойлаймын", - деп пікір білдірді Айдос Сарым.