Фильм прокатқа шыққан тұс­та әлдебіреулер интернет­тің иі­рі­мінде отырып, «Мың бала­ға» бар­ма, барғызба!» деген ұран кө­тер­­­ді. Айыбы – кинотеатрларда орыс­­ша жүріп жатыр екен. Жақында Саша Барон Коэн деген сайқымазақтың «Диктатор» дейтін киносы біздің театр­лардан көрсетіле бастады. Ен­ді неге әлгі ұран тастағыштар осы тұста айғайға баспайды деген ой келеді. «Барма! Бар­ғыз­ба!» деп. Бұл біздің мемлекетті келемежге айналдырған, жетіс­тігімізді кө­р­ме­ген, тарихымызды танымаған адам емес пе еді? Қайта бізді жапан далада жа­лаңбұт жүретін жұрт ретінде танытпады ма жа­һанға? Ұмы­тып қалсаңыз айтай­ық, бұл әлемге әйгіленіп кеткен «Борат» фильмінің авторы. Онда Қа­зақстанды кіл жаман жағы­нан көрсетеді. Тіпті, анайы­лы­ғы басым. Айтуға ауыз бармайтын тұс­тары да бар. Көптеген сырт мемлекеттің халқы осы бір шы­ғармасымақты көріп, біз туралы теріс түсінікте қалға­нын қалай жасырамыз? Әрине, одан Қазақ­станның абыройы күрт кеміп кетпеген шығар. Дегенмен бізді мен­сінбейтін, көш­тен қалған ха­лық санайтын адамның киносы қазақ жеріне жетіп, кинотеатрларынан бері­ліп, неге табыс табуы керек? «Итің жаман» десе тоңтеріс қалыпқа еніп, «бір атым насыбай» үшін көңілі қалатын ұлт­тың баласы едік қой. Енді неге бізді масқаралаған адамды төрі­мізге шығарамыз? Тоқтам салу­ға болмай ма? «Жөніңмен жүр» деуге шамамыз келмей ме? Тәжікстан мен Түркімен­стан «Диктаторға» байкот жариялап, кинотеатрларынан бер­гіз­бей тастапты. Олар Бораттың кейіпкері болған жоқ. Дей тұр­ғанмен же­ріне кіргізбеді. Өйт­кені тәрбие­лік мәні терең емес. «Мың балаға» өре түрегел­гендер, «Диктаторға» келгенде жұм­ған аузын ашпайды. Қазақ­тың әлі қазаққа ғана жете ме сонда? Олай болмаса, неге Бо­ратқа табаныңды жалтырат де­мей­ді? «Барма! Барғызба!» деп қасқайып тұрмайды? Жұды­рық­­ты жұртыңа көрсетпеу керек. Алашқа аялы алақаныңды тос. Ал басқаны басыңда ойнатпа! Біздің айтқымыз келгені де осы.