Кеше Орталық коммуникациялар қызметінде Мәжіліс депутаттары Виктор Рогалев пен Серік Сейдуманов «Еуразиялық экономикалық перспектива» атты халықаралық форумға байланысты журналистердің алдында өздерінің ойларын ортаға салды.

Бұл форум Қазақстан Парла­ментінің төменгі палатасы мен Ресей Мемлекеттік Думасының бастамашылдығымен өтіп отыр, деді алдымен сөз алған Виктор Рогалев. Қарап отырсаңыздар, бұл – жақсы қабылданып отырған қызықты жоба. Мен оның бірінші форумынан бастап қатысып келе жатырмын. Алғашқы форум Минск қаласында өткен еді. Одан кейін Арменияда, одан әрі Ресейдің Санкт-Петербург қаласында ұйымдастырылды. Бүгін, міне, төртінші форум өтіп, онда еуразиялық экономикалық дамудың болашақтағы перспективалары талқыланды. Мұнда біз тоғыз ай бойы өмір сүріп отырған Еуразиялық экономикалық одақтың ғана емес, «Жібек жолы» экономикалық белдеуінің» де даму перспективалары қарастырылуда. Бүгін ол туралы Қытайдың өкілдері де, басқалар да өз ойларын ортаға салды. Жиырмадан артық сөйлеген шешеннің арасында әріптес елдер парламенттері палаталарының спикерлері де болды. Соның ішінде Мемдуманың төрағасы Сергей Нарышкин, Тәжікстан Парламенті төменгі палатасының төрағасы Шукурджон Зухуровты айта кетуге болады.

Осыдан әрі Виктор Рогалев осы форумның тікелей өзін қызықтырған және ой туғызған бір жайттарына тоқталды. Сіздер білесіздер, бір кездерде өз заманының ең күшті әскерлеріне қолбасшылық жасаған парсының Кир патшасы Ұлы Даланы шауып алуға келген еді. Сол кезде Томирис патшаның төңірегіне шоғырланған Ұлы Даланың ержүрек ұл-қыздары жау­ды жайратып салып, өз жерлерінен қуып тастаған. Бұл арасына сына түспеген бірліктің арқасында қол жеткізілген жеңіс еді. Мұны айтып отырған себебім, осыдан 21 жыл бұрын Президент Нұрсұлтан Назарбаев Мәскеу Мемлекеттік университетінің оқытушылары мен студенттерінің алдында сөйлеген сөзінде түрлі саяси және экономикалық шабуылдарға қарсы бірігу керектігін айтқанын үлкен көрегендікке балап отырмын. Ол туралы бүгінгі сөзінде осы университеттің ректоры Виктор Садовничий де атап өтті. Бүгінгі күні де толып жатқан қауіп-қатер­лерге қарсы біз жұдырықтай жұмы­лып, тығыз біріксек қана төтеп бере алатынымызға көзіміз жетіп отыр. Оны форумда сөйлеген ше­шендердің бәрі де айтты, деді ол.

Серік Сейдуманов форумға Қазақстан мен Ресей депутат­тары мен сарапшыларынан басқа Армения, Беларусь, Қы­тай, Қырғызстан елдері депутат­тары­ның делегациялары мен саясаткер, сарапшылар, бизнес-қауымның өкілдері қатысқанын еске салып өтті. Сондай-ақ, ол Еуразиялық эко­номикалық одақ алқасының мүшелері де қатысқанын тілге тиек етті. Форумда қабылданған қорытынды құжатта Еуразиялық экономикалық одақ пен «Жібек жолы» экономикалық белдеуінің» жұмыстарын үйлестіру туралы шешім қабылданыпты. Сөзін әрі қарай жалғастырған шешен Қы­тай Халық Республикасының Төр­ағасы Си Цзиньпин 2013 жылы «Назарбаев Университетте» сөй­леген сөзінде ұсынған «Жібек жолы» экономикалық белдеуі» жоба­сын Қазақстан бірден қолда­ғанын жеткізді. Бүгінгі таңда осы бағыттағы нақты жобалар іске асырылуда, соның ішінде ұзын­дығы 3 мың шақырымға жақын «Батыс Еуропа – Батыс Қы­тай» автомагистралінің қазақ­стандық учаскесі де бар. Астанада халықаралық қаржылық орталық ашу бағытындағы жұмыстар да қызу жүргізілуде. Осы жұмыс­тар­дың бәрі Қазақстан тарабының ұсынылған жобаны қатты қолдап жатқандығының дәлелі. Бүгінгі фо­румда сөйлеген сөздерінде көпте­ген шешендер де осыны ай­тып, Қазақстан тарапына жы­лы лебіздерін білдірді. Қазақ­стан Президенті Нұрсұлтан Назарбаевтың «Нұрлы Жол» атты жа­ңа экономикалық бағдарламасы да «Жібек жолы» экономикалық бел­деуі» жобасын дамыту жоспар­лары­мен үйлескен. Осы үйлес­ті­рілген жобалар Мемлекет бас­шы­сының бес институттық жос­парын іске асыруға бағытталған «100 нақты қадам» Ұлт жоспарын орындауға да өзінің септігін тигі­зе­тіні сөзсіз, деді Серік Сейдуманов.

Осыдан кейін шешендер жур­налистердің сұрақтарына жауап берді.

Дереккөз: егемен Қазақстан