Талдықорғандағы Тілдер сарайында этносаралық толеранттылық және қоғамдық келісім мәселелері жөнінде «Орталық Азия өңірі азаматтық біртектілікті қалыптастыру мен дамыту тәжірибесі» деген тақырыпта ғылыми-сараптамалық кеңес болып өтті. Оған Қазақстан халқы Ассамблеясының мүшелері, Парламент депутаттары, шетелдік және отандық сарапшылар, мемлекеттік органдар мен этномәдени бірлестіктер өкілдері, қоғам қайраткерлері қатысты.
«Қазақстан халқы Ассамб­лея­­сының бастамасымен үшінші рет өткізіліп отырған ғылыми-сараптамалық кеңестің көздеген мақсаты мемлекетаралық достық қана емес, интеграциялық үдеріс­терді де дамыту болып табыла­ды. Өйткені, біздің арамызда эко­но­микалық, мәдени және тағы бас­қа сан-салалы ынтымақтастық бол­ғанда ғана тың қарқынмен алға жыл­житынымыз анық. Негізі дәл осы бастаманы Елбасы өте ертеректе көтерген-тін. Ойымша, мұн­дай үдерістерге әуелгі кезекте сарапшылар қатысып, түрлі қиын­дықтарды, шешімін күткен мәселелерді анықтауы қажет. Рас, Орталық Азия елдері бауырлас болғанымен, кей жағдайларда интеграциялық үдерістер қарқын ала алмайды. Сол түйткілді дер кезінде тарату үшін осындай кездесулер керек», – деді Қазақстан Республикасының Президенті жанындағы «Қоғамдық келісім» республикалық мемлекеттік меке­месі директорының орынбасары Ғазиз Телебаев.
Бұл кеңеске көршілес түркі тектес халықтармен бірге Иран, Пәкістан, Ресей, Оңтүстік Корея, Ита­лия мемлекеттерінің де өкіл­дері қатысып, өзіндік пікірлерін ортаға салды. Сол сарапшылар мен ғалымдардың біртектілікті қалыптастыру қадамдарын жасау­ға ұмтылуы көңіл толтырды. Негізі тақырып аясындағы ортақ мүдде мемлекеттік тілде сөйлеу болса, шүкір, ол бізде бар. Тағы бір баса айтар жайт – сарапшылар кеңесе отырып сырттан көмек күтпей өз мәселемізді, яғни «өзендерді пайдаланып электр қуатын өндіру секілді өмірлік қажеттіліктерді өзіміз шешуіміз қажет» деген тұжырымға тоқталғандығы болды. Бұл ретте, көптеген мәселелердің түйіні біздің елімізде шешіліп жатқандығы жасырын емес. Айталық, түркі тектес халықтар арасындағы ынтымақтастық, түсіністік, ортақ мүддеге жұмыла кірісу секілді жұмыстарға аста­налықтар ұйытқы болып, көптеген келелі істер атқарып жатқаны мәлім.
«Кеңес қорытындысында са­рап­­шылардың ұсыныстарын тиіс­ті орындар назарына ұсынатын бола­мыз. Әрине, ол ұсыныстар талқыланып, тексеріліп, сұрып­талады. Өйткені, негізгі әдіспен ұштасуы керек. Мақсатымыз – осы елдерден келген сарапшылар мен ға­­лымдардың ынтымағын ны­­ғайту. Біз қатар жатқан әрі өрке­­ниетке ұмтылған елдер болып са­на­латын­дықтан, сейіліп бара жатқан ғылыми орталық жұмысын қайта жаңғыртуымызды уақыт қажетсініп отыр. Әлемдік тұрғыдан алсақ, Қытай, Оңтүстік Корея және бүгін өкілдері қаты­сып отырған Иран, Пәкістан ел­дері біздің елімізді өте терең зерт­теп жатыр. Біздің елге деген қы­зығушылық пен айтар ой-пікір­­лер ішкі дамуымызға өзін­­дік ық­палын тигізеді деп те ойлай­мыз. Алматы облысы полиэт­нос­ты қоғам деп айтамыз. Бір қы­ры­нан қарасаңыз, жерінің орналасу ыңғайлылығы да соған сәйкес тәрізді. Мекендеген этнос­тар да Орталық Азия елдерінің барлығына тән. Екіншіден, шекаралас. Сонымен қатар, Алматы облыстық Қазақстан халқы Ассам­­б­­леясы хатшылығының да жақ­сы бастамалары бар. Түр­лен­ген Талдықорған арқылы елі­мізде жасалып жатқан жұ­мыс­тар­ды да қонақтарға паш еттік», – деді Орталық Азия өңіріндегі этносаралық және конфес­сия­аралық қатынастарды зерттеу орталығының жетекшісі Айгүл Сәдуақасова.
Ғылыми-сараптамалық ке­ңес­те Алматы облысы әкімінің орын­басары Бақтияр Өнербаев сөз сөй­леді.
Қорыта айтқанда, І.Жансүгіров атындағы Жетісу мемлекеттік уни­верситетінде жалғасқан ғылыми кеңес Достық үйінде түйінделді.

Дереккөз: Егемен Қазақстан