Қытайдың Shenzhen қаласындағы LimX Dynamics стартапы гуманоид роботтарын Таяу Шығыс пен АҚШ нарығына шығаруға дайындалып жатыр. Компанияның бұл қадамы Илон Масктың Tesla аясында дамып жатқан Optimus жобасына тікелей бәсеке ретінде бағаланып отыр. LimX қазірдің өзінде шетелдік инвестор тартып, алғашқы робот жеткізілімдерін биыл бастауды жоспарлауда.
Илон Маск Optimus роботын технологиялық болашақтың символы ретінде таныстырғанымен, оның жаппай сатылымы тек 2027 жылдың соңына қарай басталуы мүмкін екенін мәлімдеді. Ал қытайлық LimX Dynamics өз гуманоид роботы Oli моделін бірнеше ай бұрын жеткізе бастап, нақты нарыққа шығу кезеңіне өтті. Баға жағынан да айырмашылық бар: LimX роботтары салыстырмалы түрде арзан әрі бизнес пен зерттеу ортасына бейімделген.
Сарапшылардың айтуынша, қысым тек Маск тарапынан емес, керісінше оған бағытталып отыр. 2025 жылы әлем бойынша жеткізілген гуманоид роботтардың басым бөлігін қытайлық компаниялар өндірген. Ал Tesla бұл тізімде артта қалған. Morgan Stanley дерегінше, Қытай гуманоид роботтар нарығында алдағы жылдары көшбасшыға айналуы мүмкін.
Айырмашылық стратегиялық деңгейде де байқалады. Илон Маск роботтарды болашақта адам еңбегін толық алмастыратын әмбебап құрал ретінде көрсе, қытайлық компаниялар гуманоидтарды қазірден бастап өндіріс, сервис, зерттеу және қауіпсіздік салаларына енгізуге тырысып жатыр. Бұл тәсіл Қытайға технологиялық жарыста уақыттық басымдық беріп, Илон Масктың Optimus жобасын күтуден гөрі нақты өнім ұсыну арқылы нарықты ертерек жаулап алуға мүмкіндік беріп отыр.
Ал, әлемдік деңгейде гуманоид роботтар нарығы тек Илон Маск пен қытайлық компаниялармен шектелмейді. АҚШ-та Figure AI стартапы BMW зауыттарында өз роботтарын сынақтан өткізіп жатыр. Agility Robotics компаниясының Digit роботы Amazon қоймаларында логистика саласында қолданылуда. Жапонияда Toyota мен Honda ұзақ жылдар бойы адамға көмекші роботтар бағытында жұмыс істеп келеді, ал Оңтүстік Кореяның Samsung пен Hyundai концерндері өндірістік гуманоидтарға инвестицияны күшейтті. Еуропада Германия мен Франция стартаптары роботтарды медицина, қарттарға күтім және қауіпті ортада жұмыс істеу үшін дамытып жатыр. Осылайша, гуманоид роботтар жаһандық технологиялық жарыстың жаңа майданына айналып, әр ел өз моделін, өз философиясын және өз нарығын қалыптастыруға тырысуда.
