Үстіміздегі жылы қыркүйек айында «Нұр Отан» партиясы Лисаковск қалалық филиалының қоғамдық қабылдау бөліміне «Уралдомноремонт – Л» жауапкершілігі шектеулі серіктестігінің бір топ жұмысшысы өздерінің төрт ай бойы еңбекақы алмағанына, кәсіпорын директоры Сергей Ильич Жеряков күнде «ертеңмен» алдап жүргеніне шағымданып, мәселені шешуге көмектесуін өтінген. Осыған орай біз Қостанай облысының Лисаковск қаласына хабарласып, бірнеше жұмысшымен мәселенің анық-қанығын сұрап білген едік.
Валерий ДУДКО, «Уралдомноремонт – Л» ЖШС жұмысшысы:
 – Менің «Уралдомноремонт – Л» кәсіпорнында жөндеуші маман болып жұмыс жасап келе жатқаныма үш айдан асты. Кәсіпорын басшысы Сергей Жеряков бастапқыда маған «айлығыңыз 60 мың теңге болады» деп уәде берді. Жұ­мысымыз өте ауыр. Еңбек заңында бе­кітілген күніне 8 сағаттың орнына уа­қытпен санаспай 12 сағат жұмыс жасадық. Өкінішке қарай, үш айдан бері көк тиын еңбекақы алған жоқпыз. Өйткені отбасымда әйелім және төрт балам бар. Олардың ең үлкені 8 жаста да, кіш­кентайым екіде. Бұған қоса, әйелімнің бесінші нәрестеге аяғы ауыр. Отбасыммен бірге осындағы жатақхананың екі бөл­месін айына 22 мың теңге төлеп, жалдап тұрамын. Жатақханаға қарызым да жиналып қалды. Жатақхана қожайыны күн сайын «бөлмені босат!» деп әлек салуда. «Қыстың көзі қырауда шиттей балаларымызбен далада қаңғып қаламыз ба?» деген үрей бойымызды билеуде. Сондықтан заңсыздықпен күресіп келе жатқан – «Нұр Отан» партиясынан көмек күтеміз. Осы іске сіздер араласып, «Урал­домноремонт – Л» ЖШС-нің басшысы С.И.Жеряковтан барлық еңбекақымызды алып берсеңіздер екен деген үміттеміз. 
Тұраш БЕРМҰХАМБЕТОВ, «Уралдомноремонт – Л» ЖШС жұмысшысы: 
– Мен жас отбасының өкілімін. Шаңырақ көтергеніме бірер айдың жүзі болды. Жалдамалы пәтерде күн кешу­деміз. Айтпағым, біздің бригада жұмыс­шыларының айлық көрмегеніне үш-төрт айдың жүзі болды. Сондықтан сіздерден үлкен көмек күтеміз. Бізге қиналғанда қол ұшын беріп, тығырықтан шығар­саңыздар екен. Өзіміз «Уралдомноремонт – Л» жауапкершілігі шектеулі серіктес­тігінің бастығы Сергей Жеряковтан «қа­шан жалақы бересіз?» деп сұрасақ болды, алуан түрлі сылтау айтып, тайсақтайды. Сондықтан біз орын алып отырған заң­сыздықты жазып, қалалық прокуратура мен сотқа да арыздандық. Менің «Халық банкінен» алған кредитім бар. Айлықтың кешігуі салдарынан бірнеше ай бойы банк қарызын төлей алмай отырмын. Сондықтан біз «Нұр Отан» партиясынан зор үміт күтеміз. 
Ал «Нұр Отан» партиясы Лисаковск қалалық филиалының есеп, статистика және қоғамдық қабылдау секторының меңгерушісі Нұрлан Батырханұлы Бальдиков болса, «Уралдомноремонт – Л» ЖШС директоры Сергей Ильич Жеряковпен жолығып, мәселенің мән-жайын сұрап білгенін, сонда кәсіпорын басшысының Рудный қаласындағы тап­сырыс беруші «ССГПО» АҚ-тың атқа­рылған жұмысқа аударылуы тиісті қар­жыны дер кезінде аудармауы салдарынан жұмысшыларға екі айдың жалақысы ке­шіктірілгендігі туралы хабарлағанын жет­кізді. Бұған қоса, «Нұр Отан» партиясы Лисаковск қалалық филиалының бөлім басшысы орын алған оқиғаны қала про­куроры Еркін Тайкешовке тапсырған. Жұмысшылармен жүздескен қала про­курорлары олардың мәлімдемесіне орай кәсіпорын басшысынан жұмысшылардың жалақысын беруді талап еткен. Алайда, талаптың мезгілінде орындалмауына бай­ланысты Лисаковск қалалық про­кура­турасы аталмыш кәсіпорында еңбек заңдылығының қадағалануын тексерген. Тексеру нәтижесінде «Уралдомноремонт – Л» ЖШС-де еңбек заңдылығының өрескел бұзылып келгені анықталып, кәсіпорынға 250 АЕК (МРП) көлемінде айыппұл салынды.
Біз Лисаковск қаласына телефон шалып, «Уралдомноремонт – Л» ЖШС-нің директоры Сергей Ильич Жеряков мырзаға хабарластық. 
– Рас, қазіргі күні біздің кәсіпорын осындағы 21 жұмысшыға бірнеше айдың еңбекақысын бере алмай отыр. Мұның себебі, бізбен келісім жасаған Рудный қаласындағы мердігер компания тиісті қаржыны біздің есепшотымызға әлі күн­ге дейін аудармай, кәсіпорынды ты­ғы­рық­қа тіреп отыр. Ал біз болсақ, тап­сырыс беруші «ССГПО» АҚ-тың тап­сыр­масын осыдан бірнеше ай бұрын бел­гі­ленген мерзімде толық орындадық. Алайда, тапсырыс берушінің уәдесінде тұрмауы салдарынан, жұмысшыларға жалақы бере алмай отырмыз. 
– Сонда жұмысшыларға тиесілі бірнеше айдың еңбекақысын қалай төлемексіз?
– Шынымды айтсам, қазір не істе­рім­ді білмей жүрмін. Дегенмен, бір-екі апта күтсек, тиесілі қаржы шотымызға түсер деген үмітім бар. Ал жұмысшылар уақыт­пен санаспай жұмыс жасады. Сондықтан оларға тиесілі жалақы берілуі қажет. Өткен жұма күні қандай келісімді тапсы­рысты атқарғанымыз және оның келі­сілген құны қанша екендігі туралы барлық құжаттар тігілген жазбаша ес­керту-хатты біздің заңгердің қатысуымен тағы да тапсырыс беруші компанияға жолдадық. Егер бұл жолы жауап болмаса, онда жергілікті сотқа жүгінуімізге тура келеді, – деп «Уралдомноремонт – Л» ЖШС-нің директоры Сергей Ильич Жеряков мәселенің мәнісін түсіндірді.

Дереккөз: Айқын-ақпарат