Кеше Бейбітшілік және келісім сарайында Қазақстан халқы Ассамблеясы Төрағасының орынбасары – Хатшылық меңгерушісі Ералы Тоғжановтың Болгария Халықтық жиналысының (Парламент) төрайымы Цецка Цачевамен кездесуі өтті.
Кездесуге Мәдениет және спорт вице-министрі Ғалым Ах­медьяров, Қазақстан халқы Ассам­блеясы Төрағасының орынбасары Олег Дымов, Парламент Мәжілісі Әлеуметтік-даму комитетінің төрайымы Гүлнар Ықсанова және Парламент Мәжілісінің депутаты Наталья Калашникова, Қазақстан мен Болгарияның мемлекеттік органдарының өкілдері қатысты.
Болгариялық делегациямен кездесу барысында этносаралық татулық пен қоғамдық келісімнің қазақстандық үлгісі таныстырылды. Е.Тоғжанов шетелдік қо­нақтарды ҚХА-ның құрылу тари­хымен, конституциялық мәрте­бесімен таныстырып, этносаралық татулық пен қоғамдық келісімді нығайту бойынша алда тұрған міндеттер мен жүргізіліп жатқан жұмыстар, ҚХА-дан сайланған де­пу­таттардың жұмысы, халық­аралық ынтымақтастық туралы біраз мәліметтерден хабардар етті.
Кездесу барысында тараптар екіжақты ынтымақтастық мәсе­лелерін талқылап, Қазақстан Рес­пуб­ликасының Мәдениет және спорт министрлігі мен Болга­рия Республикасы Мәдениет ми­нистрлігінің арасында мәдениет саласындағы ынтымақтастық туралы келісімге қол қойылды.
«Болгария Республикасы – біздің дәстүрлі әріптесіміз. Мұның айғағы ретінде болгар тарапының қазақстандық бастамаларға, соның ішінде Қазақстанның 2010 жылы Еуропадағы қауіпсіздік және ынтымақтастық ұйымына төрағалығына, Дүниежүзілік сауда ұйымына өтуіне, БҰҰ Қауіпсіздік Кеңесінің 2017-2018 жылдарғы тұрақты емес мүшелігіне жә­не Ас­танада ЭКСПО-2017 халық­аралық көрмесін өткізу тапсырысына қолдау көрсетуін атап өтуге болады», – деді Ғалым Ахмедьяров.
Мәдениет саласындағы ын­тымақтастық туралы келісім тарих және мәдениет ескерткіштерін сақ­тау, жаңғырту және консерва­циялау саласындағы екіжақ­ты бай­ланыстарды дамытуды қарас­тырады. Сондай-ақ, Қазақстан мен Болгария кітапханалары, мұ­ражайлары, кино өнері мен кон­церттік қызмет ұйымдары ара­сындағы әріптестік қатынастарды өрістете түсуді көздейді.
Сонымен қатар, келісімге сәй­кес, мемлекеттер бір-бірімен екі жақ­тың мүдделеріне тиесілі ақпа­рат­тарымен алмасып отыратын болады. Тараптар келісімге қол қою екі мемлекет ха­лық­тары­ның арасындағы достық қарым-қа­ты­настарды күшейту мен да­мытуға жаңа серпін беретіндігіне сенім білдірді.
Сондай-ақ, Қазақстан халқы Ас­самблеясының Бейбітшілік жә­не келісім сарайындағы көрме павильонына болгар ұлттық костюмі сыйға тартылды.

Дереккөз. Егемен Қазақстан