«Астана Опера» театры екінші «Жібек жолы» ха­лық­аралық фес­тивалі аясында әлемдік деңгейдегі тұлғаларды қарсы алу дәстүрін жалғастыруда. Бұл жолы бекзат өнердің жанкүйерлеріне Джулио Боскетти (Италия) мен Нәжмиддин Мәуленовтің (Өзбекстан) өнерін тамашалауға мүмкіндік туғызылып отыр. Дж. Пуччинидің «Тоска» операсында олар негізгі партияларды орындамақ. Ал басты рөлді Қазақстанның еңбек сіңір­ген қайраткері Маргарита Дворецкая сомдайды.
Ең айтулы өнер ошақтары репертуарынан берік орын алған «Тоска» операсының қоюшы режис­сері – Лука Ронкони десек, дирижерлік тізгінде – Қазақ­станның еңбек сіңірген қайраткері Абзал Мұхитдинов.
Пуччини сюжет үшін өте күр­делі әрі әнші Флория Тоска мен суретші Марио Каварадосси (Нәжмиддин Мәуленов) ара­сындағы қайғылы жағдайда аяқ­талатын махаббат туралы аса мәнерлі шығарма жазды. Опе­радағы көрініс пен басты оқиға 1800 жылдар тұсындағы зұлматты дәуірде Наполеон әскері Италияны басып алып, республика құрған кезде өрбиді… Қос ғашық озбыр­лық, азап, абақты мен өлім құр­банына айналады… Саяси күре­с­­­тен алыс болған жандар, еріксіз оның тырнағына ілігеді. Сол кезеңдер картинасы әсерлі декорациялар арқылы ерекше жеткізіледі.
Өзбекстандық Нәжмиддин Мәуленовтің өнеріне келсек, ол – бұл салада өте биік шыңдарды бағындырып үлгерген, табынушыларын опера өнерінің иіріміне үйіре алған, ерте жасынан жоғары атаққа ие болған танымал әнші. Каварадоссидің партиясын алғаш рет 2013 жылы Антверпен, Гент және Мәскеу қалаларында бір мезгілде қатар шырқауы оның шығармашылығына үлкен жетістік алып келді.
– Кейіпкерімді өте жақсы сезе­мін, біз, тіпті, бір-бірі­міз­бен іштей түйсік арқылы түсі­нісе­міз, ұқсас жағымыз көп. Мен кезінде альфрейндік жұмыспен – қабырғаға гүл мен оюдан сурет салумен айналысқанмын. Мі­не, оны жаныма жақын тұтатын себебім. Соған орай бірінші алған білімім – ганчті (гипсті) кесуші. Ендеше, суретші мамандығы маған ешқандай да жат емес, – деді өз сұхбатында.
Оның сахнадағы әріптесі ита­лиялық Джулио Боскетти туралы айтатын болсақ, ол бүгінгі таңда Еуропаның ең беделді театрлары мен концерттік залдарында өнер көрсетеді. Шетелдік баритон «Астана Опера» мемлекеттік опера және балет театрының төрінде алғаш рет өнер көрсетпек, осы орайда әнші Қазақстанға сапары арқылы шығармашылық жағынан көп тәжірибе жинақтап қайтудан аса үмітті. Оның айтуынша, бұл сабақтастық, сондай-ақ, қос тарап үшін де өте тиімді мәдени байланыс болмақ.
– Астаналық тыңдарманды естен кетпес әсерлерге бөлегім келеді. Сол үшін «Тоскамен» жұ­мыс барысында мұндағы әріптес­теріммен бірге ортақ мүдде үшін барынша күш салуға тырысамын. Залдың көрерменге лықа толарына алдын-ала сенімдімін. Неге десеңіз «Тоска» – бұл эмоцияға толы, керемет сезім сыйлайтын қойылым десек, ал оны тамаша­лау адамды шексіз шаттыққа кенелтеді. Жұртты бір күнгі шаруасын жиып қойып, тек осымен әсерленуге шақырамын, – деді маэстро. Сонымен қатар, әнші әңгіме барысында Риголеттодан кейінгі ең сүйікті рөлі Скарпия екенін атап өтті.
– Бұл – өте-мөте күрделі кейіп­кер, – деді. – Алайда, жалпы опе­радағы ең қызықты бейне барлық жерде осы болып қала береріне сене­мін. Кезінде Пуччинидің өзі бұл туындыны қалай атауын біл­меген, тіпті, оның «Тоска» атауына біразға дейін сенімсіз болған көрінеді, себебі, аталған бей­ненің – зұлым кемеңгердің маңызы айрықша еді. Сондықтан мұндай рөлдерді орындаған кезде, әрине, кейіпкердің мінезін сомдап жеткізу өте маңызды деп есептеймін. Жазушы Генри Мил­лер айтқандай: «Өнер өмірдің мәнін түсінуден басқа ешнәрсеге үйрет­пейді», мен-дағы тек осы ай­тылған керемет сөзге шексіз илан­ған күйімнен өзгермеймін.

Дереккөз:егемен Қазақстан