Мемлекеттік биліктің бірден-бір бастауы – халық. Қоғамды демократияландыру үдерістерінде жергілікті өкілді органдардың, халық билігінің негізгі формасы ретінде, мәслихаттар мен жергілікті өзін өзі басқару органдарының маңызы өте зор.

Елбасы «Қазақстан жолы-2050 – бір мақсат, бір мүдде, бір бола­шақ» атты Қазақстан хал­қына Жолдауында «Бүгінде Отаны­мыз­дың жетістіктері – әрбір азамат­тың, ұлттың мақ­­­та­­ны­­шы. Күшті, қуатты мемлекеттер ғана ұзақ мер­зімдік жоспарлаумен, тұрақ­ты эко­номи­калық өсумен айналысады. «Қазақстан-2050» Стратегиясы – барлық саланы қамтитын және үздіксіз өсуді қамтамасыз ететін жаңғыру жолы. Ол – елдігіміз бен бірлігіміз, ерлігіміз бен еңбе­гіміз сыналатын, сынала жүріп шың­далатын үлкен емтихан. Стра­тегияны мүл­тіксіз орындап, емтиханнан мүдірмей өту – ортақ парыз, абыройлы міндет!» деп баянды болашаққа бағыт сілтеген бағдаршамды айқындап берген болатын.

Бәсекелестікке қабілетті әлем­дегі 50 елдің қатарына қосылуды мақсат еткен Қазақ елі бұл межені бағындырып, енді әлемдегі ең дамыған озық 30 мемлекеттің қатарына қосылуға бағыт түзеп отыр. Өткен жылы облысымызда 274,3 млрд. теңгеге өнеркәсіп өнімдері өндірілді. Яғни, 2013 жылмен салыстырғанда жалпы өндіріс көлемі 12,0 пайызға артты. Тамақ өнімдерін өндіру 1,2 есеге, жеңіл өнеркәсібі – 1,4 есеге, химия өнеркәсібі – 4,6 пайызға, фармацевтикалық өнімдер – 5,2 есеге, өзге металл емес минералдық өнімдер өткен жылдың деңгейінде – 100 пайыз, жиһаз жасау 1,2 есеге көтерілді. Электр энергиясын өндіру көлемі 1,5 есеге өсіп, 2742,3 млн. кВт/сағат құрады, жылу энергиясы 7,5 пайызға артты.

«Бизнестің жол картасы-2020» бағдар­ламасын іске асыру бас­талғаннан бері жалпы 45,5 млрд. теңге сомасына кәсіпкерлердің 374 жобасына қаржылық қолдау көрсетілді. Тұрғын үй құрылысына жұмсалған инвестициялар өткен жылдан 5,1 пайызға артып, жалпы көлемі 258,1 мың шаршы метр бас­пана пайдалануға берілді. Білім беру, денсаулық сақтау жүйелерін қаржыландыруға бөлінген бюд­жет­тік қаражаттар толығымен иге­­ріліп, көптеген жаңа нысандар пай­да­лануға бе­ріліп, әлеуметтік сала­лардың материалдық-техни­калық жарақтандырылу жағдайы едәуір жақсарды. Елді мекендерге ауызсу, газ құбырлары тартылуда. Жолдар жөнделіп, көшелер абаттандырылуда. Кәсіпкерлік көк­жиегі кеңейіп, жұмыссыздық деңгейі төмендеді. Мұндай мысалдарды әр ауылдан кездестіруге болады.

Міне, осындай оңды істердің бәрінде өкілеттіліктері мен білік­тіліктері артқан депутаттар корпусы халық пен билік арасындағы байланысты нығайтуға атсалыса жүріп, облыс тұрғындарының әл-ауқатын, тұрмыс жағдайын жақсартуға бағытталған экономикалық және сая­­си реформаларды жүзеге асыру барысында атқарылып жатқан жұмыстарда өз белсенділіктерін танытуда. Облыстық мәслихаттың бесінші шақырылымының құрамы негізінен өмірлік тәжірибелері мол, депутаттық қызметтің қыр-сырын жетік мең­гер­ген халық қалаулыларынан жасақталды. Бұл шақырылымдағы депутаттардың еншісіне елді мекендерге ауызсу, газ құбырларын тарту, жолдарды жөндеу, көшелерді абаттандыру, кәсіпкерлікті дамыту, жұмыссыздық деңгейін төмендету жөніндегі атқарылып жатқан қар­қынды жұмыстар науқанына кез ке­ліп отыр. Депутаттар сессияларда барлығы 600-ге жуық шешім­ қабылдады. Онда өңір­дің әлеуметтік-экономикалық дамуы­ның маңызды мәселелері қаралды. Олардың ішінде, облыстың ауыл шаруашылығына инвестиция тарту, жаңа технологиялар енгізу, қайта өңдеу, саланы техникалық жаңғырту, емдеу мекемелерінің тұр­ғындарға қызмет көрсету сапасы, тө­тенше жағдайлардың алдын алу және оның зардаптарын жою, облыстық бюджеттің атқарылуы сияқты жоспар­ланған мәсе­лелер қарастырылды. Сондай-ақ, облыс әкімінің оған жүктелген функция­лар мен міндеттердің орындалуы жөніндегі есебі тыңдалды. Сессияда депутаттар тарапынан облыс әкіміне бірқатар ұсыныстар енгізілді. Шақырылым басынан бері облыстық мәслихаттың шешімімен 16 адамға «Жамбыл облысының құрметті азаматы» атағы берілді.

Депутаттар мен атқарушы билік басшылары арасында іскерлік қарым-қатынас орнаған. Өздерін толғандырған мәселелермен депутаттар жергілікті билік өкілдері бас­шы­ларының қабылдауларында жиі болып тұрады. Өздерінің сайлау округтеріне қатысты мәслихат аппаратына келіп түскен арыз-шағымдарды тексеруге қатысады. Сондай-ақ, облыстық мәслихат депутаттары «Нұр Отан» партиясы облыстық филиалы жанынан құрылған, облыстық тәртіптік кеңес­тің және басқа да көптеген комис­сиялардың құрамында өзде­рінің азаматтық өкілеттігін абыроймен атқаруда.

Бесінші шақырылымның депутаттары өз сайлаушыларымен 200-ге жуық кездесулер өткізді, онда коммуналдық қызмет көрсету тарифтерінің көтерілуі, жолдар сапасы, сумен қамтамасыз ету, газбен жабдықтау, тұрғын үй мәселелері, еңбекке орналастыру, мектепке дейінгі тәрбиенің сапасын артты­ру, тамақ өнімдерінің бағасын қалып­тастыру, медициналық қыз­мет­ті жақсарту, мал азығын дайындау, студенттердің жолақысына жеңіл­дік жасауға ықпал ету және басқа да бірқатар мәселелер көтерілді.

Депутаттар жылдан-жылға са­уал жолдау құқығын пайда­лануда белсенділік танытып келе­ді. Соңғы үш жарым жылда депутаттар 130-дан астам сауалдар жолдады. Сауалдар Премьер-Министрге, Парламент депутаттарына, министрліктерге, облыстық басқармалар мен департаменттерге, әкімдіктерге жіберіліп отырды. Олардың 70 пайыздан астамы оң шешімін тапты.

Жалпы, облыстық мәслихаттың күнделікті тіршілігінде атқарылып жатқан шаруаларды тізбектеп шығу мүмкін емес. Облыс тұр­ғындары мен сайлаушыларымыз атқа­рылған істерге бағасын да беріп жатыр. Бүгінгі күні мәслихаттардың көш басынан көрінуі өкілетті және атқарушы биліктің іскерлігі мен нәти­желі жұмысы деп білемін.

Облыстық мәслихат жұмыс жүйе­сін жетіл­діру арқылы алға қойған міндеттерін ойдағыдай орын­дап, қабылданатын шешім­дерді әрқашан да өзекті және нақты мақсаттарға жетуге бағыттайды. Депутаттармен бірлесе отырып облы­сымыздың әлеуметтік-эконо­ми­ка­лық және ру­хани өсу жолын­дағы бағдарламаларды жүзеге асы­руға және бұл мақсатта қаржы­ның дұрыс бөлінуіне, әр жұмыс­тың уақытында орындалуын қада­ғалауға жауапкершілікпен қарап келеміз.

Бүгінгі күні еліміз үлкен жетіс­тіктерге қол жеткізіп, әлем танитын мемлекетке айналды. Мұның барлығы елдегі тұрақтылық, ха­лық­тар арасындағы бірлік пен ынтымақтастық арқа­сында мүмкін болып отыр. Сондықтан да ең алдымен, татулығымызды сақтап, береке-бірлігімізді жоғалтпауымыз қажет. Алда бірлесіп істейтін қыр­уар жұмыстар күтіп тұр. Біздің міндетіміз – Мемлекет басшысы берген тапсырмаларды қысқа мерзімде орындап шығу. Біз ұлы мұрат жолында үйлесімді жұмыс істеуіміз қажет.

Бұл арқылы біз Қазақстанның әлемдегі ең дамыған отыз елдің қатарына енуін қам­тамасыз ете аламыз. «Бірлік бар жерде – тірлік бар» дейді біздің халық. Дана жұрт мұны тегіннен тегін айтпаса керек. Ауызбірлік пен түсіністік, сыйластық үстемдік құрған жерге қашан да нәтижелі істің үйір болатыны белгілі. Облыстың ұзақ мерзімді стратегиялық даму бағ­дарламаларында халық тұрмы­сының сапасын жақсарту, азаматтық қоғам құру, ұлтаралық келісім орнату, білім беру саласын дамыту, халықтың денсаулығын нығайту секілді әлеуметтік мәселелерді шешуге де айрықша мән берілуде.

«Сын түзелмей, мін түзелмейді» дейді халық даналығы. Біріншіден, әр адам ең бірінші өзіне сын көз­бен қарай білуі керек. Өзіңді өзің сынау арқылы ойдың қабі­летін жетілдіріп, айналадағы, қоғам­дағы кемшілік-қателіктерді көру­ге болады. Екіншіден, жер­гілік­ті өзін өзі басқаруды дамыту үшін ха­­лық­тың көзқарасы, қара­пайым жұртшылықтың пікірі еске­рілгендігі дұрыс, өйткені біз халық үшін қызмет жасаймыз. Сондықтан ең бастысы, біздің сын емес, бізді таңдаған халықтың сынына құлақ түру.

Өкілетті органдарға сайлана отырып, аймақ өміріне қатысты түрлі маңызды шешімдер қабылдау, оның жүзеге асуын бақылау барысында жерлестеріміздің мүдделерін қорғау міндеті біздерге жүктелгенін жақсы сезіне білуіміз қажет. Әри­не, жұмыс болған соң барлық жердегідей жұмысқа қанағаттанып, риза болатын, немесе көңіл толмай қалатын сәттер де болып жататыны белгілі.

Дегенмен, мәслихат жұмысына тың өз­ге­рістер енгізу, сайлаушылар мен депутаттардың тығыз байланысын қалыптастыру, жұмыс­тардың нәтижелі болуын қамтамасыз ету, біздің бүгінгі жұмысымыздың негізгі бағыты болып табылады. Сондықтан мәслихат депутаттары атқарушы органдармен бірлесе отырып, өздеріне сенім білдірген халықтың мүддесі үшін қызмет етіп, облыстың эконо­микалық, әлеуметтік дамуына сүбелі үлес қосып келеді. Біз жұмысымызды осы бағытта одан әрі жалғастыра бермекпіз.

Бағлан ҚАРАШОЛАҚОВ,

Жамбыл облыстық мәслихатының хатшысы.

ТАРАЗ.

Дереккөз: Егемен Қазақстан