Tanymal qazaqstandyq kásipker, «Shymkent pıvo» seriktestiginiń dırektory Toqtar Tóleshov Jer reformasyna qatysty mıtıńterdi qarjylandyrǵan jáne bılikti kúshpen basyp alýǵa daıyndyq jumystaryn júrgizgen. Búgin QR Bas prokýratýrasynda ótken brıfıń barysynlda QR Ulttyq qaýipsizdik komıteti Baspasóz qyzmetiniń ókili Rýslan Karasev pen QR Bas prokýratýrasynyń departament basshysy Qusaıyn Igembaev málimdedi, - dep habarlaıdy Qamshy.kz Baq.kz-ke silteme jasap.
«Budan buryn habarlanǵanymyzdaı, arnaıy prokýror men vedomstvoaralyq arnaıy tergeý tobymen transulttyq, qylmystyq qarjylandyrý, uıymdasqan qylmystyq topty basqarý, zańsyz esirtki zattaryn saqtaý men «Shymkent syra» zaýytynyń ıesi Toqtar Tóleshevke jáne onyń aınalasyndaǵy birneshe adamǵa qatysty qylmystyq ister tergeldi. Kórsetilgen árekettermen qatar, Tóleshevke aýyr jáne asa aýyr qylmys, onyń ishinde adam óltirýdi uıymdastyrdy, túrli dárejedegi dene jaraqatyn keltirý, adam urlaý, basqa bireýdiń múlkin qasaqana joıý qylmystaryn jasady degen aıyptar taǵyldy. Soynmen birge, qazirgi kezde Tóleshevtiń jalpy qylmystyq, sonymen qatar, konstıtýsıalyq qatystylyǵy anyqtaldy. Qylmystyń bul bóliginiń quzyrettiligi boıynsha QR UQK tergeýde», – deıdi Qusaıyn Igembaev.
Al Ulttyq qaýipsizdik komıtetiniń baspasóz qyzmetiniń ókili Rýslan Qarasaevtyń málimdemesi bylaı boldy:
«Tergeýde Tóleshev myrzanyń buryn bılikti kúshpen basyp alýǵa daıyndyq jumystaryn júrgizgendigi, ótken jyldan beri belsendi naqty áreketter qoldanǵany týraly tolyq málimetter alyndy. Onyń áreket josparynda qaýiptilik oshaqtaryn baqylap, el ishindegi jaǵdaıdy turaqsyzdandyrý, narazylyq aksıalaryn jáne jappaı tártipsizdikterdi uıymdastyrý, onyń aınalasynda balamaly úkimetti qalyptastyrýdy josparlaý jáne áreket etýshi bılik qurylymyn ózgertý qarastyrylǵan. Atyraý, Astana, Almaty, Oral, Qyzylorda qalalarynda jer reformasy dep atalatyn qarsy narazylyq aksıalary Tóleshev myrzamen ótken jyldyń jeltoqsan aıynda daıyndalyp, onymen qarjylandyrylǵany týraly dálelder alyndy. Atalǵan narazylyq aksıalaryn budan da erterek ótkizý josparlanǵany naqty anyqtalǵan. Biraq, Tóleshevtiń tutqyndalýyna baılanysty aksıany ótkizý ýaqyty tikeleı uıymdastyrýshylarmen ózgertilgen. Qazirgi tańda olardyń keıbireýleri quryqtalǵan».
Onyń aıtýynsha Tergeý organdary Qazaqstannyń basqa da óńirlerinde uıymdastyrylǵan narazylyq aksıalaryn qarjylandyrý týraly faktilerdi qaraǵan.
«Tóleshev tergeý ızolátorynda bola otyryp, eldegi qalyptasqan jaǵdaıdy paıdalana otyryp, 2016 jyldyń mamyrynda OQO Saryaǵash qalasynda jappaı tártipsizdik uıymdastyrýǵa árekettengen. Óziniń josparlaryn iske asyrý maqsatynda Tóleshev quqyq qorǵaý organdarynyń burynǵy jáne qarýly kúshterdiń joǵary laýazymdy tulǵalary, sondaı-aq, qarýly kúshterdiń keıbir basshylary qatarynan maqsatty túrde óziniń jaqtastaryn izdestirgen. Tóleshev myrzaǵa óziniń áreketterin iske asyrý maqsatynda paıdalanylǵan jasyryn oryndardaǵy qarý-jaraqta, jarylǵysh zattar UQK tárkilengen. Ótken demalystarda QR UQK qyzmetkerleri Astana, Almaty, Shymkent qalalarynda Tóleshevtiń birqatar sybaılastary men jaqtastary tutqyndalǵan. Olardyń qatarynda QR Bas prokýrorynyń burynǵy birinshi orynbasary, QR Konstıtýsıalyq keńesiniń burynǵy múshesi, İİ sanattaǵy Ádilet Keńesshisi Baqtybaev İlıas, OQO İİD burynǵy bastyǵy general-maıor Dosqalıev, OQO İİD bastyǵynyń burynǵy birinshi orynbasary polısıa polkovnıgi Sáken Aıtbekov, QR Qorǵanys mınıstrligi Ońtústik aımaqtyq basshylyǵynyń 35748 jáne 55652 áskerı bólimderiniń komandırleri polkovnıkter Jumın Bekzat jáne Tólebaev Qaırat. Atalǵan tulǵalar tutqyndalyp, ýaqytsha tergeý ızolátoryna otyrǵyzylǵan. Bularǵa qatysty bultartpas sharalaryn qoldaný máselesi sheshilýde. Qazir tergeý amaldary jalǵasýda. Bul qylmystyq iske qylmystyq aqparat búgin kelip túsýine baılanysty jáne tergeý qupıalylyǵyna baılanysty jurtshylyq nazaryna usynylyp otyrady», – dedi UQK ókili.
Esterińizge salsaq, Shymkent syra kompanıasynyń basshysy, tanymal kásipker Toqtar Tóleshov 30 qańtar kúni qamaýǵa alynǵan bolatyn. Sot oǵan tergeý kezinde qamaýda ustaý bultartpaý sharasyn qoldandy. Oǵan tutqyndalǵan sátte esirtki zattaryn zańsyz saqtady, satty, qylmystyq topty zańsyz qarjylandyrdy degen aıyptar taǵyldy. Sondaı-aq, kásipkerdi ustaý operasıasy kezinde odan áldebir dinı kitap tárkilendi degen de aqparat taraǵan. Tórt aıǵa sozylǵan tergeý jumystary barysynda Tóleshovtiń tóńkeriske talpynǵany anyqtalyp otyr.
