Májilis depýtaty Baqytbek Smaǵul Aqtóbe qalasynda bolǵan jaǵdaıǵa oraı pikir bildirdi, - dep habarlaıdy Qamshy.kz Qazaqstan Jańalyqtaryna silteme jasap.

Depýtat Aqtóbedegi oqıǵanyń barlyq jaýapkershiligi dástúrli emes radıkaldy uıymdardyń moınynda ekenin aıtyp otyr.

«Biz bul sol óńirdegi salafıt, ýahabıtterdiń qolymen jasalǵanyn túsinýimiz kerek. (..) Búgingi jaǵdaı bizdiń turaqtylyǵymyzǵa qol suqqysy keletininiń, bizdegi beıbit, tolerantty jáne demokratıalyq ómirdiń bireýlerge unamaıtynynyń dáleli», - degen B. Smaǵul. Shet elderde soǵysyp júrgen júzdegen qazaqstandyqqa alańdaýly depýtat terorızmniń búginde tamyryn tereńge jibergenin aıtady.

«Bizdiń elimiz beıbit kún keshýi úshin olardy túp-tamyrymen joıý qajet. Biz osyndaı qatal joldy tańdaýǵa májbúrmiz. Adam ómiri men onyń konstıtýsıalyq quqyqtaryn qorǵaý – memlekettik mindeti», - dep otyr depýtat.

Mundaı bassyzdyqtardyń bir sebebebin depýtat bıliktiń bostyǵynan da kóredi.

«Biz dástúrli emes dinı aǵymdarǵa erkindik berip, toleranttylyq tanyttyq, al, qazir sonyń «jemisin» kórip jatyrmyz. Azamattardyń qaýipsizdigimen táýekel etýge bolmaıdy. Biz qansha synap, eskertý jasasaq ta onyń bireýi júzege aspady», - deıdi B. Smaǵul.

Esterińizge salsaq, keshe Aqtóbe qalasynda birneshe qarýly adam atys jasap, eki birdeı qarý-jaraq dúkenine, polısıa bólimshesine jáne Ulttyq ulannyń áskerı bólimine shabýyl jasaǵan. Resmı derekter boıynsha, qaraqshylardyń qolynan 6 adam qaza taýyp, 10 shaqty adam jaraqattanǵan.