Nebir quıtyrqy ańyzdardy qıynnan qıystyryp júrgen «Eýrazıa» arnasy ózderiniń teris pıǵyldaryna qazaq qoǵamynda zor bedelge ıe, sózderi ótimdi mamandardy da paıdalanýdy ádetke aınaldyrǵan. Bul týraly Qamshy.kz habarlaıdy.
Ótken mamyr aınyda telearna eki kún qatarynan (28,29 mamyr kúnderi) saıasattanýshy Dosym Sátbaevtiń burynyraqta múldem basqa máselege oraı bergen suhbatyn qıyp alyp, ruqsatsyz paıdalanǵan. Paıdalanǵanda da tutastaı bir halyqty, jer taǵdyry men ana tiliniń bolashaǵyna alańdaýly jurtty aıyptaıtyn, kúıe jaǵatyn úgit quraly retinde usynǵan. Buǵan baılanysty D. Sátbaev ózi de narazylyq bildirgenin bilemiz.
Sol oqıǵadan bir kún ótpeı arna reseılik rejıser, prodússerlermen birge túsirilgen «Arab kóktemi. Qýyrshaq basqarýshylar» ("Arabskaıa vesna. Kýklovody") degen derekti fılm kórsetti. Basynan aıaǵyna deıin reseılik ıdeologıanyń ısi ańqyp turǵan, musylman álemine ashyq jala jabatyn fılmde taǵy da telearna qazaqstandyq saıasattanýshylardy paıdalanyp upaı jınaýǵa talpynǵan. Vıdeonyń úshinshi mınýtynda taǵy da D. Sátbaevtiń suhbaty salynǵan. Saıasattanýshynyń transulttyq kompanıalar, medıholdıngter týraly buryn aıtqan sózderin arab elderindegi tóńkeriske qatysty pikir retinde qosa salǵan. Bir qyzyǵy, fılm jasaýshylar suhbat berýshiniń aty-jónin tıtrmen bermegen. Urlyq vıdeo bolǵan soń uıattary oıandy ma, basqa sebebi bar ma, ol jaǵy beımálim.
Sondaı-aq, osy fılmde (4:20 mınýt) Rasýl Jumaly degen tıtrmen taǵy bir jigititń pikiri berilgen. Biraq, ol suhbat berýshi biz tanıtyn saıasattanýshyǵa múldem uqsamaıdy. Fılmdegi «Rasýl Jumaly» lańkestikten keletin shyǵyndar týraly esep qaǵyp otyr.
Osylaısha, álemniń ár túpkirindegi tóńkerister men narazylyq sharalaryn jamandap, qazaqtardy úrkitý, úreılendirýdi maqsat etetin arna sol arampıǵyldaryna qazaq zıalylaryn da paıdalanýdy kózdeıtin sıaqty.
Telearnanyń bul qıanaty respýblıkalyq deńgeıde kóterilip, jańa qurylǵan aqparat jáne komýnıkasıa mınıstriniń de qulaǵyna jetken bolatyn. Almaty qalasynda osy arnanyń telehabaryna qatysty shaǵymǵa saı, sot prosesi de júrip jatqanyn esterińizge salamyz.
