İshki ister mınıstri Qalmuhanbet Qasymov Astanada esep berý kezdesýin ótkizip, onda Aqtóbede oryn alǵan qandy oqıǵaǵa qatysty málimettermen bólisti, - dep habarlaıdy Qamshy.kz.

Mınıstrdiń aıtýynsha, lańkestik áreket uıymdastyrmaq bolǵandardyń sany áý basta 45 adam bolǵan kórinedi.

«Olardyń sany naqtylandy – 45 adam. Biraq, olar jıhad jarıalap, páterden shyqqan kezde birazy ol sheshimnen bas tartqan. Olardyń barlyǵy anyqtaldy, qazir tergelý ústinde. Qalǵan 26 adam ári qaraı ketken. Biraq, jol boıynda taǵy úsheýi ol toptan qalyp qoıǵan. Qarý-jaraq satatyn dúkenge kelgende bir sodyr taǵy ketip qalǵan. Beınekameralardan biz dúkenge 25 adam kirgenin kórdik», - deıdi mınıstr.

Sonymen, lańkestik áreket jasaýǵa daıyndalǵandardyń jalpy sany basynda 45 adam bolǵan, keıin 20-sy qylmysqa barýdan bas tartqan.

Mınıstr olardyń bul áreketke barýdaǵy daıyndyǵyna nazar aýdartyp otyr.

«Olar bir páterde jınalady. Ol páterdi anyqtap, tekserdik. Olar úıden shyqqanda barlyǵy telefondaryn jańaǵy páterde tastap ketken, bul eshkim óz týystaryna habarlasyp qoımaý úshin qajet bolǵan», - deıdi mınıstr.

Alǵashqy dúkende olar 9 mınýt bolǵan kórinedi. Dúkenge shaqyrý núktesi basylǵannan soń kúzet jasaǵy kelgen. Kúzet qyzmetkeri dúkenge kirip kelgende atylǵan. Úsh mınýttan keıin kelgen polısıa jasaǵyn da oq jaýdyryp qarsy alǵan. Sol kezde BAQ-ta jarıalanǵandaı, kelesi dúkenge barǵan alty adamnyń úsheýi sol jerde polısıa qolynan jan tapsyrsa, bireýi jaralanyp qolǵa túsken, ekeýi qashyp ketip, keıin qala syrtynda óltirilgen bolatyn.

Mınıstr aıtqan oqıǵanyń qalǵan bóligi aldynda jarıalanǵan málimetterden alshaq emes.

Q. Qasymov kezdesýde osy Aqtóbe oqıǵasy boıynsha polısıa qurylymdarynda birqatar anyqtaý jumystary júretinin aıtty.

Óıtkeni, aqparat taratý kezinde polısıa tarapynan birqatar olqylyqtar bolmaı qalmady, «kúdiktilerdiń tizimi» delingen qujattar áleýmettik jeli arqyly tarady. Ol tizimnen ózderiniń aty-jónin kórgen birneshe adam áleýmettik jeli arqyly shý shyǵardy.

Mınıstr jýrnalıserdiń osy olqylyqtarǵa qatysty da suraqtaryna jaýap beripti.

Máselen, Danıar Ýaısov esimdi stýdent óziniń osy tizimde «óltirilgender» qatarynda júrgenin aıtyp, vıdeoúndeý jarıalaǵan edi.

«Aty-jónin aýystyryp jibergen jaǵdaılar bar, bul máseleni sheship jatyrmyz. Al qaza tapqanǵa kelsek, bul sol kúni tańda boldy, saǵat altylar shamasynda. Ol onyń týǵan aǵasy delindi, sóıtsek, inisi bolyp shyqty. Sondyqtan osyndaı baǵyttama taralyp ketken, biraq keıin ákesi tanyp, biz túzep qoıdyq. Al, onyń vıdeoda qaıdan júrgendigin anyqtaý maqsatynda qyzmettik tekseris júrip jatyr», - degen mınıstr lańkestikke qarsy operasıa qorytyndysy boıynsha biraz polıseıdiń «shańyn qaǵatynyn» aıtady.

«Biz ótkizgen operasıalar boıynsha biz árıne, anyqtaý júrgizemiz. Bizdiń patrúldik polısıaǵa, basshylarǵa jekelegen is-qımyldar boıynsha suraqtarymyz bar. Qandaı da bir sheshim qabyldasaq sizderge habarlaıtyn bolamyz», - deıdi Q. Qasymov.