Eı, zamandas! Eń aldymen dosyńdy uq!

Dosyń – jer, sý, móldir aýa, ósimdik.
Ala júrip osylardyń syılyǵyn,

Osylardy qorlaý degen ne sumdyq?..

Júzgen balyq, júgirgen ań, ushqan qus
Degen emes «adamzatqa dushpanbyz».
Barlyǵynyń molshylyǵyn maldanyp,
Taptyq yrys tabıǵattaı dostan biz.

Aqyl-oıǵa ashyp bergen ne syryn
Tabıǵattan suraý kerek keshirim.
Kózimizshe daraqylar áldebir
Tirshilikke tıgizip júr kesirin.

Sýdy lastap, jerdi aıyryp qunardan,
Aýany ýlap tapqan tabys quny arzan.
Ne qymbatty tárk etip júr «oljaǵa»
Qunyqqandar áste shyqpaı qumardan.

Deýshiler ǵoı: «Bar tabıǵat qul maǵan»,
Bireýine aıaýshylyq qylmaǵan.
Daraqylar, jumysy joq ósimmen,
Jospar úshin qurtqandaryn qundaǵan.

Ury mergen aqbókendi elik pen
Jaýdan beter jamsatady nelikten?..
Óskeninen óshkeni kóp haıýanat
Nege tozbaq borly tastaı jel úkken?..

Eı, zamandas! Jaýaptymyz bul «iske»,
Sol «oljadan» almasaq ta búlishke.
Sarqylýǵa esh haqy joq baılyqty
Salǵyzbaıyq bul sekildi bóliske!

Jer eshkimge jazbaıdy dep aryz da,
Baryn sarqyp ala bermek paryz ba?..
Joq, zamandas! Ár urpaqqa týǵan jer
Ne berse de, beretini – qaryzǵa!..

Sol sebepti tózedi jer zar qaqpaı...
Daraqynyń beti kóne jarǵaqtaı.
Sol jarǵaqty ózimiz-aq jyrtaıyq,
Keleshektiń adamyna qarǵatpaı!