«Jer kodeksine» byltyr engen ózgeristerdiń keı normalaryn júzege asyrýdy toqtata turý týraly Prezıdent Jarlyǵy zań kúshine enetin 1 shildege deıin zańmen bekitilýi tıis eken, - dep habarlaıdy Qamshy.kz 31-arnaǵa silteme jasap.
Qoǵamda qyzý talqyǵa túsken jerdi satý jáne jalǵa berý týraly kodekstiń kúshine enetin merzimi taıaǵan saıyn parlament jantalasa bastady. Búgin májilis depýtattary zańdy toqtata turý týraly qujatty maquldady. Tipti, jýyrda ǵana aýyl sharýashylyq mınıstri bolyp, keshe vıse-premer atanǵan Asqar Myrzahmetovke kóp salmaq túsirmeı, ózara kelisip qabyldap jiberdi.
Jer kodeksin halyqqa túsindire almaǵany úshin aıypty bolyp, jumysynan aırylǵan Asyljan Mamytbekovtyń ornyn basqan Asqar Myrzahmetovtiń jańa laýazymda májiliske birinshi kelýi edi. Keshe ǵana premer-mınıstrdiń orynbasary bolyp taǵaıyndalǵan basshy, jer kodeksi jónindegi komısıanyń tóraǵasy da atanǵan bolatyn. Ótken aptada Aqmola oblysynda bas qosqan komısıa músheleri, osy senbide Almaty oblysynda jınalmaq.
ASQAR MYRZAHMETOV, QR Aýyl sharýashylyq mınıstri, vıse-premer:
- Komısıa barlyq eldi-mekendi tolyq aralaý shart emes shyǵar. Óıtkeni komısıanyń alǵashqy otyrystarynda qabyldanǵan sheshimge sáıkes qazirgi oblystarda qurylǵan qoǵamdyq keńesterge osy jumysty óńirde barlyq eldi mekenderdi qamtı otyryp atqarý tapsyrylǵan.
Aldaǵy jıynda komısıa otyrysyn Baqytjan Saǵyntaevpen birlesip basqaramyn, ary qaraı ózim jeke qolǵa alamyn degen Asqar Myrzahmetov daý týdyrǵan zańdy toqtata turý jónindegi baıandamasymen májilismenderdiń aldyna bardy. Depýtattar mınıstrge suraq qoımaq túgil "ýaqyt tyǵyz" dep óz-ózderin asyqtyrdy.
SAPARHAN OMAROV, QR Parlamenti Májilisiniń depýtaty:
- 2016 jylǵy 1 shildege deıin qabyldaý qajettigin eskere otyryp jáne osy zań jobasy bas komıtettiń jáne jumys tobynyń otyrysynda jan-jaqty talqylanǵandyǵyn eskerip sizderden ony 2-shi oqylymda qaraý máselesin búgingi otyrystyń kún tártibine engizýdi suraımyn.
Osylaısha ekinshi oqylymda da talqylaýsyz maquldanǵan zań jobasy senatqa joldandy. Byltyr qabyldap jiberip, kodekstegi 4 bapty qaıta qaraý kerek dep prezıdent toqtatqannan keıin óz qatelikterin túsinse kerek. Kelgen jumysyn oıdaǵydaı bitirip shyqqan mınıstrge jýrnalıserdiń taǵy suraǵy boldy.
ASQAR MYRZAHMETOV, QR Aýyl sharýashylyq mınıstri, vıse-premer:
- Ol qaptaǵandyqtan emes. Ol josparly túrde óńdeletin alqaptarda jumystyń der kezinde atqarylmaǵanynan ǵana oryn alyp otyrǵan másele. Muny 2000 jyldaǵy shegirtkeniń qaptaǵanymen salystyrýǵa bolmaıdy.
2000 jyly shegirtke qaptaǵanda aýyl sharýashylyǵy mınıstriniń orynbasary bolǵan Myrzahmetov myrza bıylǵy jaǵdaıdy belgili bir jaýapty tulǵalardyń salǵyrttyǵy dep paıymdaıdy. Arnaıy qurylǵan komısıa bul boljamdy rastasa, olqylyqqa jol bergender jazalanbaq. Al dıhandardyń shyǵynyn kim óteıtini týraly eshkim tis jarmady.
