Halyqaralyq aýyr atletıka federasıasy London olımpıadasynyń synamalaryn qaıta tekserip, nátıjesinde 4 qazaqstandyq chempıonnyń: Ilá Ilın, Zúlfıa Chınshanlo, Maııa Maneza jáne Svetlana Podobedovanyń qanynan ruqsat etilmegen preparattardyń tabylǵanyn jarıalady. Olar dopıng qoldandy degen aıyppen tergeý aıaqtalǵansha jarystardan shettetilgen edi. szh.kz aýyratletter qanynan tabyldy delingen preparattardyń kúshi qanshalyqty ekenin zerttep kóripti.
IWF 4 altyn ıegeri, Svetlana Podobedova, Ilá Ilın, Zúlfıa Chınshanlo, Maııa Manezanyń qanynan myna preparattardyń tabylǵanyn jarıalady:
Ilá Ilın – Degıdrohlormetıltestosteron, Stanozolol
Zýlfıa Chınshanlo – Oksandrolon, Stanozolol
Svetlana Podobedova – Stanozolol
Maııa Maneza – Stanozolol
Stanozololdyń kúshi qandaı?
Stanozolol — bodıbılderler, boksshylar, balýandar, jeńil jáne aýyratletteri eń jıi qoldanatyn, sportta ruqsat etilmegen preparat. Ony — 1962 jyly Winthrop Laboratories kompanıasy veterınarıa salasyna qatysty jasap shyǵarǵan. Ásirese, jylqy malynyń júıriktigin arttyratyn jáne ózge de emdik maqsatta qoldanylatyn preparat bolyp eseptelgen. Keıinen sportshylar kúsh beretin preparat retinde qoldana bastaǵan. Sondaı-aq, ol kádimgi steroıdtar retinde aǵzadaǵy zat almasý prosesin jyldamdatady, bulshyqet pen onyń bederligine yqpal etedi. Súıekten kálsıdiń bólinip shyǵýyna bolysady, aǵzada fosfor, azot, kúkirtti saqtap turady. Vırılızmdi damytýyna qaramastan, salystyrmaly túrde qaýpi az preparat esebinde ony sporttaǵy áıelder de jıi qoldanady.
Steroıd áserinen shash túsip, bezeý, bórtpe paıda bolýy múmkin jáne baýyr qyzmetine keri áserin tıgizýi de yqtımal.
Qazaqstandyq jeńil atlet Olga Shıshıgına atalmysh preparatty qoldanǵany úshin 1996-1998 jyldar aralyǵynda sporttan shettetilgen.
Degıdrohlormetıltestosteron
Salmaq dárejesi eskeriletin sport túrlerine qatysty jıi qoldanylatyn preparat. I. Ilınnen buryn A. Óteshev, J. Qydyrbaev, E. Ómirtaı degıdrohlormetıltestosteron qoldandy degen aıyppen sporttan shettetilgen edi. Preparattyń negizgi áseri: bulshyqettiń jyldam jetilýine, artyq kúsh alýǵa múmkindik beredi, súıektiń maıysyp ketýiniń aldyn alady.
Ilá – Pekın, London Olımpıadalarynda 94 kelide baq synaǵan, keıinen 105 kelige aýysqan sportshy.
Oksandrolon
Rıo Olımpıadasynan da altynǵa úmitti Zýlfıa Chınshanlo qanynan tabyldy degen oksandrolon preparaty bulshyqet massasyn ony joǵaltqan kezde arttyrý maqsatynda, sondaı-aq VICH/SPID-ten emdelý kezinde paıdalanylady. Oksandrolon – jyldamdyq mańyzdy ról atqaratyn sport túrlerimen aınalysatyn atletter arasynda jıi qoldanylatyn preparat bolyp sanalady.
Mádenıet jáne sport mınıstrligi Halyqaralyq olımpıada komıteti (HOK) dopıng daýyna ilikken qazaqstandyq aýyr atletterdi júldelerinen aıyryp, Rıo-de-Janeıro olımpıadasyna qatysýyna tyıym salsa, oǵan shaǵymdanatynyn málimdedi. Bul týraly mádenıet jáne sport vıse-mınıstri Sáken Musaıbekovke silteme jasaǵan jergilikti agenttikter habarlady.
Eske salaıyq, maýsym aıynyń basynda sheteldik aqparat quraldary qazaqstandyq aýyratletterdiń qanynan dopıng tabylǵany jóninde habarlaǵan bolatyn. Olardyń málimetinshe, Ilá Ilın men Zúlfıa Chınshanlo aldaǵy Olımpıada oıyndaryna qatysa almaýy múmkin.
