Ol –  qazaqtyń lırık aqyny, muzbalaq aqyn, óz zamanynda laıyq baǵasyn ala almasa da ózinen keıingiler úshin mártebesi bıik aqıyq aqyn, aýdarmashy, dramatýrg.

Muqaǵalı Almatydaǵy qazaq ádebıeti men óneriniń qaımaqtary shoǵyrlanǵan ortada ótkergen az ǵana jyldar ishinde ózindik dara únin, sýretkerlik qaıtalanbas darynyn tanytyp, ónimdi eńbektene bildi. «Ilıch» (1964), «Armysyńdar dostar» (1966), «Qarlyǵashym keldiń be?», «Mavr» (1970), «Aqqýlar uıyqtaǵanda» (1973), «Shýaǵym meniń» (1975) atty jyr jınaqtaryn kóziniń tirisinde jarıalap úlgerdi.

Muqaǵalı Maqataev poezıa janrynda ǵana emes, proza, drama, syn salasynda da qalam tartty. Onyń «Qosh, mahabbat» jınaǵyna ár jyldar jazylǵan «Qulpytas», «Marýsányń taýy», «Ózgermepti», «Áje» áńgimeleri, «Qos qarlyǵash», «Jyl qustary» povesteri men «Qosh mahabbat» pesasy, birneshe synı eńbekteri engen.

Muqaǵalı aýdarma salasynda da ózindik sheberlik shalymymen tolymdy eńbekter tyndyra aldy. Ol Danteniń «Qudiretti komedıasynyń» «Tamuq» atty bólimin, Shekspırdiń «Sonetterin», Ýolt Ýıtmenniń óleńderin qazaq tiline aýdardy.

Shyǵarmalary ózbek, qyrǵyz jáne taǵy basqa tilderge aýdarylǵan. Muqaǵalı qaıtys bolǵannan keıin QR Jazýshylar odaǵy Muqaǵalıdiń atyndaǵy ádebı syılyq taǵaıyndalyp, oǵan QR Memlekettik syılyq, “Ǵasyr aqyny” ataǵy berildi. 60 jyldyq mereıtoıy qarsańynda aqynnyń týǵan jerinde murajaıy ashyldy. Almatyda aqyn atynda mektep, kóshe jáne sol kóshe boıynda Muqaǵalıǵa arnalǵan eskertkish bar. Muqaǵalı óleńderine N.Tilendıev, D.Raqyshev, Sh.Qaldaıaqov, İ.Jaqanov, A.Altynbek Qorazbaıuly Qorazbaev, T.Rahımov, M.Rústemov, T.Muhamedjanov, Á.Tinálıev, B.Oraluly, T.Dosymov, t.b. sazgerler án jazdy. 1985 jyly Qazaqstan Jazýshylary Odaǵynyń bastamasymen úzdik ádebı shyǵarma avtorlaryna M. Maqataev atyndaǵy syılyq taǵaıyndaldy. Al 2008 jyly M.Maqataev atyndaǵy jańa syılyq taǵaıyndaldy.