Aqpannyń 22 kúni Nurmuhan Jantórın atyndaǵy Mańǵystaý oblystyq mýzykalyq drama teatry Nartaı Saýdanbekulynyń "Amanat" atty pesasyn qoıady. Atalǵan pessa negizinen Álıhan Bókeıhan men Alash arystaryna arnap jazylǵan. Bul Álıhan Bókeıhannyń 150, Alashorda memleketiniń 100 jyldyǵyna úlken tartý bolyp otyr.

Osy pessany jazý barysynda Nartaı baýyrym ótken jyly biz shyǵarǵan "Alash aıtqan asyl sóz" atty kitaptan biraz derek alypty. Máselen, Álekeńniń «Ǵumyr ózgerildi. At urlaǵan adamdy tyshqandaı óltire salatyn orys mujyǵymen aýyldas boldyq» nemese «Ulttyń joǵyn uıyqtap júrip emes, oıaý júrip izdeý kerek. Qazaq balasy birigip, tize qosyp is qylsa halyqtyń maqsaty sonda oryndalady» degen jáne t.b. sózderi dáıek retinde keltirilgen eken.

Shyny kerek Álekeńe arnalǵan spektákl jazyp, ony sahnaǵa shyǵarý úlken jumys. Tipti, erlikpen para-par desem artyq aıtqandyq emes. Sondyqtan da osy istiń basy qasynda júrgen Nartaı men Gúlsına syndy qazaqtyń qaısar uly men qyzy jáne barsha mańǵystaýlyq teatr ujymyna alǵysym sheksiz. Ár qazaq óz deńgeıinde qoldan kelgenshe ulttyq múddeni ulyqtaýǵa úles qossa, Alash arystarynyń amanatyna adaldyq tatytar edik. Alashtyń bıylǵy 100 jyldyq mereıtoıynda elimizdiń ózge óńirlerindegi teatrlar da «Amanatty» qoısa nur ústine nur bolar edi.