Ómirzaq Aqjigit esimdi Facebook áleýmettik jelisin paıdalanýshy "Qazaqstan" telearnasynda kórsetiletin "Sálem, Qazaqstan" baǵdarlamasynda óner kórsetken "Orda" tobyna qatysty óz pikirin bildirdi. 

""Sálem, Qazaqstanda" ne bar desem, "Orda" bar eken. Tórteýi 4 jaqqa qarap turatyn edi, úsheýi qalypty. (Buryn 5 bolǵan eken). Bar tózimimdi boıyma jıyp, kórip otyrdym. "Ǵashyq bolsań" men "Olaı emesten" eshqandaı aıyrmashalyq kórmedim. Óıtkeni, munda ne joq - bári bar sekildi. Qyshqyra ma-aý, qyńsylaı ma-aý, mıaýlaı ma-aý, shyńǵyra ma-aý, shıqyldaý ma-aý, biraq, ol jerde eshqandaı án joq! "Án bar!" deıtin adamnyń psıhıkasy durystyǵyna kúmánim bar. Sekirý, julqyný, bulqyný, kórermenge artyn berip kıreleńdeý, ıreleńdeý, taǵy da "bári" bar. Eń aqyry sý qarańǵy soqyrlar kıetin qara kózildirik te, "shópjelke" prıcheska da bar. Tek óner joq!

Bir ýaqytta atyshýly "91" toby shyqty. Ózbekter "Samarqanda bir apam bar, ol menen de soraqy" dep beker aıtpaıdy eken, "Ordama" jylap kóriskendeı boldym. Shydamymnyń shegi bir saǵatqa jetpeı úzildi.

Habardy júrgizýshi jigit  "15 jyl boıy "Ordanyń" ánderimen sýsyndap kelemin, jasaı ber!" dep jatyr. 15 jyl boıy kókteı qaýlap ketken "ordalar" sýsyndatyp kele jatqan urpaqty oıladym. Kóńilim qulazydy. Bir táýlik ózime ózim kele almaı júrdim. Tek keshe keshte Shámshiniń kınosyn kórip, ánderin tyńdap, taza aýaǵa shyqqandaı, ústimdegi bylǵanǵan kıimnen qutylǵandaı áserde boldym.

"Keńes ókimeti qulady, endi órkenıettiń bulaǵyna bas qoıamyz dep edik, sóıtsek, kanalızasıasyna qosylyp ketippiz ǵoı" dep Muhtar aǵamyz aıtqandaı, Shámshi, Áset, Nurǵısa, t.b. sańlaqtardyń saf ánderinen sýsyndap ósken biz shyn baqytty ekenbiz ǵoı! Osyny oılaǵanda baryp, byltyr Jer komısıasynyń otyrystaryna jastardy shaqyryp keltire almaıtynymyzdyń, jalpy olardyń nege osynsha saıası beıtaraptyǵynyń syryn uqqandaı boldym. Anaý zaldaǵy jastarǵa maǵynaly óleń de, ásem án de kerek emes, olarǵa qoldaryn kókke kóterip, yrǵaqpen teńselip turý ǵana kerek. Olar bizdiń urpaq sekildi óz qatary, óz zamandastarynyń bir de bir ánin qosylyp aıta almaıdy da! Joq bolsa neni aıtsyn... "Poteránnoe pokolenıe" degen osy. Olar seniń jerińdi qaıtsin, ultyńnyń tóbesine tóngen qaýip-qaterdi, elińniń bolashaǵyn qaıtsin...

Árıne, kópke topyraq shashýdan aýlaqpyn, tek óz pikirimdi, mazalaǵan oıymdy aıttym".