Instagram jelisinde 3,7 mıllıon oqyrmany bar túrik aspazy Nýsret Gókche álemge tanyldy dep jazady massaget.kz. Jalpaq jurttyń nazaryna ilikken áreket – túrik aspazynyń ózine ǵana tán et týrap, tuz sebý ádisi. Et týraýǵa óner retinde qarap, oń qolymen effekt berip tuz sebetin jigit – naǵyz ártis sekildi.
Nýsret 1983 jyly Túrkıanyń soltústik-shyǵysyndaǵy Erzýrým qalasynda dúnıege kelgen. Kópbalaly, kedeı otbasynda týǵan Nýsrettiń ákesi qarapaıym shahter bolǵan. Ata-anasy oqýynyń aqysyn tólep bere almaǵandyqtan, orta mektepti de aıaqtamaı, oqýdan shyǵyp qalǵan túrik jigiti búginde tabysty bıznesmenge aınaldy. Juldyzyn ınstagram jelisi jaqqan jigit jetistikke jetý jolynda kúnine 18 saǵat tynymsyz eńbek etken. Argentınada birneshe jyl jumys istep, et pisirýdiń qupıasyna qanyqqan.
Aty-jóni brendke aınalǵan Nýsr Et búginde Túrkıanyń birneshe qalasynan, Abý-Dabı men Dýbaıdan óziniń steık-haýsyn ashqan. Ol – aspazdyq salasynda álemge tanylǵan tulǵa, yqpaldy tulǵalar moıyndaǵan kásibı maman ıesi. Onyń meıramhanasyna Leonardo Dı Kaprıo, Antonıo Banderas, Floıd Meıvezer sıaqty kóptegen juldyz kelip qonaq bolady. Al Rıanna men Ben Afflek Gókcheniń avtorlyq qımyly beınelengen jeıde kıip shyqty.
Abý-Dabıde mynadaı strıt-art salyndy.
Amerıkalyq telearnalar túrik jigitiniń tanymaldyǵyna qaıran qalyp, ol týraly sújet kórsetti. Onyń tamaqqa degen erekshe kózqarasy, aspazdyq salasyna degen aıryqsha mahabbaty oǵan ataq pen dáýlet ákeldi. Ol et pisirý tásilin sheber meńgergen. Sondaı-aq tartymdy syrtqy kelbeti de Nýsretti aspazdar arasynan erekshelep tur.
Instagram jelisinde Nýsretke tańyrqaǵan jandar #SaltBae heshtegimen aspazǵa arnap jyly lebiz bildirýde. Jumysqa ystyq yqylaspen kirisý kez kelgen adamdy jetistikke jeteleıtinin dáleldegen túrik jigiti kópke úlgi bolyp júr.
