Sársenhan Batyrhan Bórihanuly – 1995 jyly 28 naýryzda OQO, Ordabasy aýdany, Aqpanbatyr aýylynda týǵan. Túrkistan qalasyndaǵy HQTÝ-dyń jýrnalısıka fakúltetin bitirgen. Halyqaralyq «Beıbitshilik álemi» baıqaýynyń 1-dárejeli dıplomanty; Respýblıkalyq «Mahambet oqýlarynyń» laýreaty; Respýblıkalyq KATEV baıqaýynyń laýreaty; Respýblıkalyq Qojabergen jyraý músháırasynyń 2 oryn ıegeri; Oblystyq «Shyraılym-SHubaıqyzylym» atty aqyndar baıqaýynyń bas júldegeri; M.Maqataev, Qasymbek Dáribaev atyndaǵy jas aqyndar baıqaýynyń bas júldegeri; HVİİ Halyqaralyq «Shabyt – 2014» shyǵarmashyl jastar festıvaliniń «Úzdik ádebı shyǵarma» atalymy (Poezıa) boıynsha Bas júlde ıegeri.
Qazirgi tańda Ál-Farabı atyndaǵy QazUÝ-de magıstratýra mamandyǵy boıynsha bilim alýda.
Ádebıet pen ónerdiń, shyǵarmashylyqtyń altyn besigi, qara shańyraǵy Almatyǵa at basyn tireýińizge ne sebep boldy?
Bul suraqqa alǵash Túrkistanǵa barǵanda jazǵan myna eki shýmaq jaýap berer dep oılaımyn.
Almatyǵa bar deıdi súıikti anam,
Myna ólkeni qalaısha qıyp baram.
Han Táńiri tursa da anashym-aı
Týǵan ólke taýlary bıik maǵan.
Zańǵar taýlar týdyrǵan kóp danany,
Jarq etken daryndardyń ot tabany.
Barmaımyn Almatyńa, áı,biraq ta,
Óleńderim jetektep ap barady..
Ne sebepten jýrnalısıkany tańdadyńyz? Aqyndyq pen jýrnalısıkany qatar alyp júrýge bola ma?
Ázilhan Nurshaıyqovtan bastap kóptegen tulǵalar jýranalıstıkany bitirgen. Aqyn-jazýshy bolý úshin sol mamandyqqa túsý qajet degen oı keldi. Alaıda jýrnalısıka mamandyǵy aqyn tárbıelemeıtinin kesh túsindim. Keı sabaqtan ishim pysatyn. Ózime qajetsiz dúnıelerdi mıyma qondyrýǵa erinshekpin. Sońǵy partada kitabymdy oqyp otyryp, basymdy kótersem 4 kýrstan bir-aq shyǵyppyn.
Balalyq shaǵyńyz, óz týǵan jerińiz jaıly syr shertseńiz?
Týǵan jerim-Ońtústik Qazaqstan oblysy, Ordabasy aýdany. Ordabasy - úsh júzdiń basy birikken meken. Men balalyqtan áli aryla qoımaǵan adammyn. Bálkim ǵumyr boıy bala bop ótetin de shyǵarmyn. Biraq ómir, qoǵam ony qalaı qabyldaryn bilmeımin.
«Talap-táńirden, talant-pendeden» Aqyndyq óner sizge qalaı darydy?
Tomas Edısonnyń «Danyshpan - bul 1% talant pen 99% eńbek »-dep aıtqan sózi bar.
Sondyqtan, men ár mınýtymdy, ár sekýntymdy izdenis jolyna jumsaýǵa tyrysamyn. Bala kezimnen bilte shamdarǵa qumar bolyp , solardyń astynda ómirimdi ótkizdim. Anam ylǵı tún ortasynda kelip, shamymdy óshirip ketetin. Ol «uıyqta» degeni.
Ataqty bolý degendi qalaı túsinesiz?
Nebári 19 jasymda «Shabyt » festıvaliniń júldesin berdi. Bes saǵat qana uıyqtap izdenip júrgen jerimnen ómirlik rejımderim kúrt ózgerdi. Toıǵa,otyrysqa,keshterge shaqyratyndar kóbeıdi. Ýaqyttarymnyń kóbi jylap ótti sol shaqta. Birneshe aı toqyraýǵa tústim. Esimdi jıýyma jazýshy Aıagúl Mantaıdyń bir ǵana sózi qatty áser etti.
Qandaı kitaptar jáne qandaı aqyndardy oqısyz?
Talǵap oqımyn. Bir kitaptaǵy bilimdi júz kitaptan terip júrip ýaqyt joǵaltqym kelmeıdi. Lev Tolstoıdyń shákirtimin.
Qazirgi qoǵamda aqyndar arasynda sózge án jazý beleń alyp barady. Iaǵnı, aqyndyqty bızneske aınaldyryp jatqan jandar az emes?
Ánge sóz jazý da ózinshe óner. Bul da bir oıdyń nárliligin, tapqyrlyqty talap etetin dúnıe.
«Adamdar aldasa da,
Armandar aldamaıdy»-degen edińiz. Qandaı armandaryńyz bar ?
Shynymdy aıtsam, men tań qalamyn. Men armandaǵan dúnıelerdiń barlyǵy derlik oryndalyp jatyr. QazUÝ-de oqýdy armandaǵan edim, ol da oryndaldy. Aldyma bir kitap qoıyp, dál osyndaı kitabym shyqsa eken deýshi edim (syrtqy pishimi), kitabym da jaryq kórdi. Armandar oryndalady! Men oǵan kámil senemin. Aldaǵy armandarymnyń júzege asýyna barymdy salýdamyn.
Álıhan Bókeıhanov atamyz: «Túzý qalam qısaıǵan, ótkir qalam mújilgen zaman» degen edi. Qazirgi qoǵamda ne nársege kóńilińiz tolmaıdy?
Bala kúnnen «Ultqa ne isteı alamyn?» degen suraq mazalaıdy. Osy suraqty Muhtar aǵaǵa (Shahanov) qoıǵanymda, «áli balasyń ǵoı» dedi. Sodan beri erterek er jetkim keledi.
«Kúlip bastap , kúlkisiz qoshtasatyn,
Jyldarmenen , jyrlardy jek kóremin»-degen ekensiz. Ótkenge ókinishińiz kóp boldy ma?
Kóp ýaqytymyzdy ótken shaq pen keler shaqty oılap joǵaltyp jatamyz. Ótken shaqta «áttegen-aı» deıtin jaǵdaılar boldy. Biraq ókinip san soqpaımyn. Qatelik bolsa sabaq alyp, jaqsylyq bolsa jigerlendim.
Stýdenttik shaqty bastan ótkizip kórdińiz. Stýdentterge óz aqylyńyzben , tilegińizdi aıtsańyz?
Stýdent sózi qatelespesem «izdenýshi» degen maǵynany bildiredi. Eger adamdardy kólik dep alatyn bolsaq, sol kólikterdiń janarmaı beketinde eń uzaq turatyn jeri «stýdent» beketinde. Keıbireýler janarmaı quıdyrýdyń ornyna piste shaǵyp jatady.Úsh júz segiz ret kúlip bolǵansha, beketten ótip te ketedi. Ár mınýtty bilim janarmaıyn quıýǵa jumsasańyzdar eken! Qalǵan qyzyqtar sonyń kóleńkesinde bılep te úlgeredi.
Suhbatyńyzǵa rahmet! Shyǵarmashylyq tabys tileımiz.
Suhbattasqan : Tilegen Kógershin
