17 naýryz Almatydaǵy «Kemel» dene shynyqtyrý-saýyqtyrý kesheninde Shańyraq kúnine arnalǵan «Áke, ana jáne men – sportpen shuǵyldanatyn otbasy» atty ınklúzıvti otbasylyq estafeta ótti.

Jarysqa ınklúzıvti sanattaǵy balalar men olardyń ata-analarynan turatyn komandalar qatysty. Qatysýshylar «Balans», «Dopty baqylaý», «Olımpıadalyq sheńber», «Pıramıdany jına» jáne «Balalar — ómirdiń gúli» syndy túrli sporttyq ári oıyn kezeńderinde baq synady.

İs-shara jyly ári dostyq rýhta ótip, otbasylardy biriktirip, qatysýshylarǵa jarqyn emosıa men umytylmas áser syılady. Ásirese, árbir bala úshin jaıly ári qoldaýshy orta qalyptastyrýǵa erekshe kóńil bólindi.

Ata-analardyń aıtýynsha, bul kún olar úshin naǵyz merekege aınaldy. Balalardyń qanshalyqty belsendi ári emosıalyq turǵyda ashylǵanyna erekshe qýanysh bildirdi.

Mundaı is-sharalardy ótkizý ınklúzıvti sportty damytýǵa, otbasylyq qundylyqty nyǵaıtýǵa jáne salaýatty ómir saltyn nasıhattaýǵa baǵyttalǵan.