Búgin «Almaty Arena» muz saraıy kóktemniń áýezdi yrǵaǵymen myńdaǵan bala júregin toǵystyrǵan biregeı mádenı oqıǵanyń ortalyǵyna aınaldy. Almaty qalasy Bilim basqarmasy uıymdastyrǵan aýqymdy joba ulttyq rekord ornatyp, el tarıhyna altyn árippen jazyldy.
Bastamanyń maqsaty – Naýryz meıramy qarsańynda qala turǵyndary men qonaqtaryna merekelik kóńil kúı syılaýmen qatar, shahardaǵy jas mýzykanttardy ortaq shyǵarmashylyq arnaǵa toǵystyrý. Fleshmobtyń negizgi mindeti – dombyranyń qońyr úni arqyly ulttyq murany dáripteý, óskeleń urpaqtyń rýhyn kóterý jáne qazaq mádenıetiniń kórkemdigin keńinen tanytý.
Jobaǵa daıyndyq birneshe aı buryn bastaldy. Arnaıy mýzykalyq popýrrı jasaý barysynda dástúrdi áýender men zamanaýı yrǵaqtar ushtastyryldy. Baǵdarlamaǵa Tólegen Muhamedjanov pen Altynbek Qorazbaevtyń ánderi, Nurǵısa Tilendıevtiń kúıleri jáne Qurmanǵazynyń áıgili «Balbyraýyn» kúıi jańa óńdeýde engizildi. Sonymen qatar, qoıylymǵa zamanaýı tehnologıa arqyly jasandy ıntellekt negizinde avtorlyq beınemazmun ázirlendi.
Daıyndyq jumystary qala boıynsha keń aýqymda ótti. 200-den astam mektep pen qosymsha bilim berý uıymdarynda dombyra ansámblderi qurylyp, jobaǵa negizinen 7–10 synyp oqýshylary qatysty. Birneshe apta boıy myńǵa jýyq pedagog 11 500 jas dombyrashyny tarıhı sahnaǵa daıyndady.
Fleshmob barysynda oqýshylar bir orkestrge birigip, arnaıy daıyndalǵan mýzykalyq týyndyny bir mezette oryndady. Myńdaǵan dombyranyń úni bir arnada úndesip, jas urpaqtyń birligi men ónerge degen qurmetin aıqyn kórsetti. Aýqymy, jas talanttardyń sheberligi jáne ulttyq mádenıetke degen qurmet úılesken bul kórinis kórermender men qonaqtarǵa erekshe áser qaldyrdy.
İs-sharanyń sharyqtaý sáti — rekordtyń resmı tirkelýi boldy. Almaty qalasy Bilim basqarmasynyń bastamasyn Qazaqstan rekordtar kitaby qoldady. Uıymnyń bas redaktory Qýanysh Ámirqululy Tazabekovtiń atyna aldyn ala resmı hat joldanyp, barlyq talaptyń saqtalýyn qamtamasyz etý úshin sarapshylar is-sharaǵa arnaıy qatysty.
Qazaqstan rekordtar kitabynyń ókilderi qatysýshylar sanyn eseptep, oryndaýdyń úılesimdiligi men uzaqtyǵyn (4 mınýt 38 sekýnd), sondaı-aq baǵdarlamanyń biregeıligin muqıat baǵalady. Buǵan deıingi rekordtardan ereksheligi, almatylyq oqýshylar bir ǵana kúı emes, klasıkalyq jáne zamanaýı shyǵarmalardan quralǵan kúrdeli popýrrıdi oryndady.
Fleshmob sońynda uıymnyń bas redaktory Q.Á. Tazabekov «Jappaı jetistikter» sanaty boıynsha jańa ulttyq rekordtyń ornatylǵanyn resmı túrde jarıalap, Almaty qalasy ákimdiginiń Bilim basqarmasyna arnaıy sertıfıkatty saltanatty túrde tabystady.
Bul jetistik byltyr Taldyqorǵanda tirkelgen (5 000 qatysýshy) kórsetkishten asyp túsip, Almatynyń ulttyq dástúrlerdi saqtaýda kóshbasshylyq ustanymyn taǵy bir márte dáleldedi. Buǵan deıingi rekordtar Atyraýda (2010 j. – 1 073 adam), Oralda (2010 j. – 1 700 adam) jáne Astanada (2024 j. – 3 200 adam) tirkelgen bolatyn. Almatynyń jańa kórsetkishi álemdik Gınnes rekordyna (2010 j. Qytaıda – 10 450 dombyrashy) jaqyndap, ulttyq mádenıettiń áleýetin pash etti.
«Dombyra úni» fleshmoby aýqymdy mádenı shara ǵana emes, urpaqtar sabaqtastyǵynyń aıqyn kórinisi, ulttyq qundylyqtardyń ómirsheńdigin dáleldeıtin taǵylymdy bastama. Bul ıgi is jas býyn tól mádenıetti saqtap, jalǵastyra alatynyn kórsetti. İs-shara sońynda qatysýshylar erekshe áser alyp, el tarıhyna qosqan úlesi úshin maqtanysh sezimin arqalap tarqasty.
