Qazaqstannyń joǵary bilim berý keńistiginde aıryqsha orny bar, eldiń ǵylymı-ıntellektýaldyq áleýetin qalyptastyryp kele jatqan jetekshi oqý oryndarynyń biri – ál-Farabı atyndaǵy Qazaq ulttyq ýnıversıteti. Ýaqyt synynan súrinbeı ótken bul bilim ordasy jahandaný dáýiriniń talaptaryna beıimdele otyryp, ulttyq kadrlar daıarlaýdyń altyn besigine aınaldy.
QazUÝ – ǵylym men bilimniń, dástúr men jańashyldyqtyń toǵysqan ortasy. Ýnıversıtet qabyrǵasynda qalyptasqan akademıalyq mádenıet, halyqaralyq standarttarǵa saı bilim berý júıesi jáne úzdiksiz jańaryp otyratyn oqý baǵdarlamalary QazUÝ-in Ortalyq Azıadaǵy aldyńǵy qatarly joǵary oqý oryndarynyń birine aınaldyrdy. Búginde QazUÝ álemdik bilim keńistiginde Qazaqstannyń brendi retinde tanylyp otyr.
Ýnıversıtet qurylymyndaǵy mańyzdy baǵyttardyń biri – Geografıa jáne tabıǵatty paıdalaný fakúlteti. Fakúltet quramyndaǵy «Rekreasıalyq geografıa jáne týrızm» kafedrasy. Bul kafedra elimizdegi týrızm salasy úshin kásibı mamandar daıarlaıtyn biregeı ǵylymı-bilim berý ortalyǵy bolyp sanalady. Onyń qalyptasýy men damýyna kórnekti ǵalym, týrızmologıa ǵylymynyń negizin qalaýshylardyń biri Stanıslav Ramazanovıch Erdáýletovtiń qosqan úlesi zor.
Kafedra – týrızm ındýstrıasynyń naqty talaptaryna jaýap beretin zamanaýı bilim men tájirıbeni ushtastyratyn orta. Munda bilim alýshylar tek teorıamen shektelmeı, qonaq úı bıznesi, týrısik menedjment, rekreasıalyq resýrstardy baǵalaý, marshrýttyq josparlaý sıaqty baǵyttarda praktıkalyq daǵdylardy meńgeredi. Nátıjesinde, túlekter eńbek naryǵynda suranysqa ıe, básekege qabiletti maman retinde qalyptasady.
QazUÝ-niń atalmysh kafedrasynda bilikti profesor-oqytýshylar quramy stýdentterge sapaly bilim berip qana qoımaı, olardyń kásibı baǵdaryn aıqyndap, ǵylymı izdeniske jeteleıdi. Bul – bolashaq mamannyń jan-jaqty damýyna negiz bolatyn mańyzdy faktor.
Kafedranyń ereksheligi – akademıalyq dástúr men belsendi stýdenttik ómirdiń úılesiminde. Stýdentter túrli ǵylymı jobalarǵa qatysyp, halyqaralyq baılanystar ornatyp, kásibı ortaǵa erte beıimdeledi. «JasTýr» klýby sıaqty uıymdar jastardyń kóshbasshylyq, uıymdastyrýshylyq jáne shyǵarmashylyq qabiletterin damytýǵa múmkindik beredi. Sonymen qatar, týrızmdi nasıhattaýǵa baǵyttalǵan is-sharalar men jobalar stýdentterdiń tájirıbelik daıyndyǵyn arttyryp, salaǵa degen qyzyǵýshylyǵyn tereńdetedi.
Ǵylymı-zertteý baǵytynda da kafedranyń áleýeti joǵary. Týrızmdi damytý, rekreasıalyq resýrstardy tıimdi paıdalaný, aımaqtyq týrızmdi jetildirý máseleleri boıynsha júrgizilip jatqan zertteýler el ekonomıkasyna naqty úles qosyp keledi.
Halyqaralyq áriptestik pen akademıalyq utqyrlyq baǵdarlamalary ál-Farabı atyndaǵy qazaq ulttyq ýnıversıtetiniń jahandyq deńgeıdegi bedelin arttyra túsýde.
Búginde QazUÝ geografıa jáne tabıǵatty paıdalaný fakúltetiniń túlekteri elimizdiń týrısik kompanıalarynda, halyqaralyq áýejaılarda, memlekettik uıymdarda jáne álemdik qonaq úı jelilerinde tabysty eńbek etýde. Keıbiri halyqaralyq deńgeıde qyzmet atqaryp, Qazaqstannyń týrısik áleýetin álemge tanytýda. Bul – berilgen bilimniń sapasy men júıeliliginiń aıqyn kórsetkishi.
Qazirgi tańda týrızm – tek ekonomıkalyq salanyń ǵana emes, mádenı dıplomatıanyń da mańyzdy quralyna aınalyp otyr. Osy turǵydan alǵanda, «Rekreasıalyq geografıa jáne týrızm» kafedrasy – eldiń ımıjin qalyptastyratyn, ulttyq brendti ilgeriletetin mamandar daıarlaıtyn strategıalyq ortalyq. Munda bilim alǵan árbir jas – Qazaqstannyń beıresmı elshisi ispettes.
Qazaq ǵylymynyń qara shańyraǵy - ál-Farabı atyndaǵy Qazaq ulttyq ýnıversıteti – bilim men ǵylymnyń, tájirıbe men jańashyldyqtyń úılesken úlgisi. Bul – tek maman daıarlaıtyn orta ǵana emes, eldiń ıntellektýaldyq  bolashaǵyn aıqyndaıtyn mańyzdy kúsh.
 
Jannat ALIEVA,
ál-Farabı atyndaǵy QazUÝ
Rekreasıalyq geografıa jáne
týrızm kafedrasynyń dosenti,
geografıa ǵylymdarynyń
kandıdaty.