2026 jyly 20 naýryzda Qazaqstan Respýblıkasy Parlamenti palatalarynyń birlesken otyrysynda «Alataý qalasynyń arnaıy mártebesi týraly» konstıtýsıalyq zań jobasy birinshi oqylymda qaraldy.
Qujat Memleket basshysynyń 2025 jylǵy Joldaýynda berilgen tapsyrmalaryna sáıkes ázirlenip, Alataýdy zamanaýı, ekologıalyq taza ári tehnologıalyq turǵyda damyǵan qala retinde qalyptastyrýǵa baǵyttalǵan. Zań jobasy qalany ózindik qarjy modeli, arnaıy salyq rejımi jáne jańartylǵan basqarý júıesi bar derbes ekojúıe retinde damytýdy kózdeıdi.
Jańa basqarý modeliniń negizgi tetigi – qalanyń damý baǵyttaryn aıqyndaıtyn jáne memlekettik organdardyń qyzmetin úılestiretin arnaıy qala keńesi bolmaq. Onyń quramy Memleket basshysy tarapynan bekitilip, tóraǵasy retinde Premer-Mınıstr belgilengen.
Premer-Mınıstrdiń orynbasary Qanat Bozymbaevtyń aıtýynsha, bul qujat Alataý qalasynyń jedel ári turaqty damýyna jaǵdaı jasaý maqsatynda ázirlengen.
Zań jobasyn ázirleý barysynda halyqaralyq tájirıbe, sonyń ishinde Sıngapýr men Dýbaıdyń ozyq úlgileri eskerilgen. Bul qalaǵa basqarý, salyq jáne ınvestısıa tartý máselelerin óz betinshe sheshýge múmkindik beredi. Sonymen qatar halyqaralyq standarttar men tehnıkalyq reglamentterdi engizýge jol ashady.
Zań jobasy kelesi baǵyttardy qamtıdy:
* jergilikti memlekettik basqarý organdarynyń qurylymy men ókilettigin jetildirý;
* sıfrlyq aktıvterdiń aınalymyn retteý;
* tómen bıiktiktegi áýe keńistigin paıdalaný jáne ushý apparattaryn damytý;
* ınvestısıalardyń qorǵalýy men turaqtylyǵyn qamtamasyz etý;
* arnaıy salyq rejımin jáne erekshe búdjet qatynastaryn qoldaný.
Qazirgi tańda jalpy quny 1,8 trln teńge bolatyn 44 ınvestısıalyq joba bar. Olardy iske asyrý shamamen 30 myń jańa jumys ornyn ashýǵa múmkindik beredi. Uzaq merzimdi perspektıvada, 2050 jylǵa deıin, qala ınfraqurylymyn damytýǵa shamamen 10 trln teńge qajet bolady. Sonymen qatar 50 mlrd AQSH dollaryna deıin sheteldik ınvestısıa tartý josparlanyp otyr.
Inovasıalyq kólikterdi engizýge erekshe kóńil bólingen. Olardyń qatarynda aerotaksı men júk drondaryn iske qosý, Alataýdy Almaty, Qonaev qalalarymen jáne týrısik aımaqtarmen baılanystyratyn vertoporttar salý, sondaı-aq áýe kóligin paıdalaný arqyly týrısik baǵyttardy damytý bar. Bolashaqta týrıser Almaty halyqaralyq áýejaıy arqyly «Medeý» sport keshenine jedel jetý múmkindigine ıe bolady.
Zań jobasynyń ekinshi oqylymy 2026 jyldyń 27 naýryzynda ótedi. Aı sońyna deıin qujatty Memleket basshysynyń qaraýyna berý josparlanǵan.
Bul bastama Alataýdy ınvestısıalar men ınovasıalar tartatyn jańa ortalyqqa aınaldyryp, ony turaqty damý men tıimdi memlekettik basqarýdyń zamanaýı talaptaryna saı qala retinde qalyptastyrýǵa múmkindik beredi.
