Respýblıkalyq referendýmda Almaty oblysy turǵyndarynyń belsendiligi joǵary boldy. Ortalyq saılaý komısıasynyń saǵat 20:00-de bergen málimeti boıynsha óńir halqynyń saıası naýqanǵa qatysýy 71,46%-dy qurady. Bul oblys halqynyń mańyzdy memlekettik sheshimder qabyldaýǵa joǵary talpynysyn kórsetedi.
Alǵashqylardyń biri bolyp Qonaev qalasyndaǵy №949 referendým ýchaskesinde Almaty oblysynyń ákimi Marat Sultanǵazıev óz tańdaýyn jasady.
Bul kúni óńir halqymen birge tanymal sportshylar, mádenıet qaıratkerleri, depýtattar jáne basqa da tanymal tulǵalar belsendilik tanytty. Mysaly, Ótegen batyr aýylynda 2024 jylǵy Olımpıada oıyndarynyń kúmis júldegeri Demeý Jadyraev, Qarǵaly aýylynda grek-rım kúresinen Sýrdlımpıada oıyndarynyń chempıony Andreı Samarın, al Qonaev qalasynda aralas jekpe-jek sheberi Shavkat Rahmonov daýys berýge keldi.
Referendým ár býyn ókilderin biriktirdi.
Shonjy polıtehnıkalyq kolejinde alǵash ret 18 jastaǵy stýdent Dıana Selmahýnova daýys berdi. Uıǵyr aýdanynda ýchaskege jas jubaılar keldi, al Eńbekshiqazaq aýdanynda jas otbasy óz tańdaýyn jasady.
Aǵa býynnyń qatysýy erekshe iltıpat pen qurmet týdyrdy. 102 jastaǵy Uly Otan soǵysynyń ardageri Alym Kebırov ýchaskege óz aıaǵymen bardy, Uzynaǵashta soǵys ardageri Fedor Kovalev daýys berdi, al Eńbekshiqazaq aýdanynda 75 jyl birge turǵan, Túrgennen kelgen erli-zaıypty Ysqaqovtar úıden daýys berdi.
Referendým kúni tańerteńnen bastap ýchaskelerde turǵyndardyń belsendiligi joǵary boldy. Adamdar otbasymen, dostarymen jáne kórshilerimen daýys berýge keldi.
Qonaev jáne Alataý qalalarynda, sondaı-aq birqatar aýdandarda ýchaskelerge alǵashqy saǵattarda adamdardyń kóp kelýinen úlken kezek paıda boldy.
Referendým ótkizý úshin ýchaskeler daýys berýge arnalǵan kabınalarmen, stasıonarlyq jáne tasymaldanatyn jáshiktermen, sondaı-aq baıqaýshylar men komısıa múshelerine arnalǵan oryndarmen tolyq jabdyqtaldy.
Aımaqta 677 ýchaske jumys istedi. Prosesti uıymdastyrýǵa arnaıy oqytýdan ótken 4781 komısıa múshesi tartyldy. Daýys berý barysyn baqylaýdy 16 óńirlik jáne 11 respýblıkalyq qoǵamdyq uıymdardyń ókilderi júzege asyrdy, bul rásimniń ashyqtyǵyn qamtamasyz etti.
Daýys berýdiń qoljetimdiligine erekshe nazar aýdaryldy. Ýchaskelerde pandýstar, yńǵaıly kabınalar ornatyldy, kórý jáne estý qabileti nashar adamdarǵa arnalǵan arnaıy qurylǵylar qoıyldy. Múmkindigi shekteýli azamattar úshin ınvataksı qyzmeti jumys istedi, al komısıa múshelerine qajetti kómek kórsetildi.
Kóptegen eldi mekende referendým kúni aýylsharýashylyq jármeńkeleri, qolónershiler kórmeleri jáne konserttik baǵdarlamalar ótti.
Aıta keteıik, İle aýdanynda birneshe ýchaskede “Baýyrsaq party”, Aqshı aýylynda “Shubat Party” aksıasy uıymdastyryldy.
Daýys berýmen bir mezgilde óńirde ekologıalyq aksıalar ótti. “Óz aǵashyńdy otyrǵyz jáne daýys ber” bastamasy aıasynda turǵyndar, depýtattar, eriktiler men jurtshylyq ókilderi oblystyń qalalary men aýyldaryna aǵash otyrǵyzdy.
Bul kún erekshe epızodtarmen este qaldy. Ótegen batyr aýylynda ýchaskege “Zveropolıs” múltfılminiń keıipkerleri keldi, Esik qalasynda daýys berýshiler «Altyn adamdy» baıqady, al Qonaevta qar barysy bolyp kıingen adam turǵyndardyń nazaryn aýdardy.
Ýchaskelerge velosıpedshiler, “Endýro” motoklýbynyń qatysýshylary, shańǵyshy-sportshylar jáne draıf-jarystardyń jeńimpazdary keldi.
Osylaısha, Almaty oblysyndaǵy referendým mańyzdy qoǵamdyq-saıası oqıǵaǵa ǵana emes, sonymen qatar azamattyq belsendilikke toly ótti. Almaty oblysyndaǵy referendým osyndaı qaıtalanbas sátterimen erekshelendi.
