Qostanaı oblysyndaǵy Amangeldi aýdandyq sotynyń zalynda jasalǵan qarýly shabýyldyń mán-jaıy belgili boldy, - dep habarlaıdy Tengrinews.kz portaly Qostanaı oblystyq sotynyń baspasóz qyzmetine silteme jasap.

"Bıyl 28 aqpanynda saǵat 10.00 shamasynda sot otyrysy bastalǵanǵa deıin azamat N.J.Bekıbaev azamatsha J.A.Taýbaevamen sózge kelip, kútpegen jerden aıaq kıminiń ishinen pyshaq alyp, oǵan birneshe ret suǵyp alǵan. Qaqtyǵys kezinde sýdıa men sot qyzmetkerleri sot zalynda bolmaǵan. Azamat N.J.Bekıbaev ózin toqtatpaq bolǵan sot prıstavyna belsendi qarsylyq kórsetken", - delingen sottyń habarlamasynda.

Osydan keıin, sottaǵylardyń aıtýynsha, ony oqıǵa ornyna shuǵyl kelgen sot tóraǵasy men "Mamandandyrylǵan kúzet qyzmeti basqarmasy" MM qyzmetkerleri toqtatqan. Jedel járdem shaqyrylyp, jaralanǵan áıel aýrýhanaǵa jetkizilgen. Biraq alǵan jaraqatynan ol qaza tapqan. Sonymen qatar, oqıǵa ornyna Amangeldi aýdandyq İİB shuǵyl tergeý bólimi shaqyrylyp, er adam solarǵa tapsyrylǵan.

"Oqıǵa Amangeldi aýdandyq sotynyń ǵımaratynda J.A.Taýbaevanyń N.J.Bekıbaevpen neke buzý týraly shaǵymy boıynsha sot otyrysy bastalǵanǵa deıin sot zalynda oryn alǵan. İs boıynsha tóraǵalyq etýshi sýdıa - N.T.Malelova", - delingen sottyń habarlamasynda.

Sonymen qatar, sottaǵylardyń aıtýynsha, óz áıelin pyshaqtaǵan er adam Arqalyq memlekettik ınstıtýtyn "Dene shynyqtyrý jáne sport" mamandyǵy boıynsha bitirgen, Amangeldi orta mektebinde muǵalim, dzúdomen aınalysady eken.

Sot ǵımaratyna pyshaq alyp ótý deregi boıynsha, aýdandyq sotta kezekshilik etken "Mamandandyrylǵan kúzet qyzmeti basqarmasy" MM qyzmetkerlerine qatysty qyzmettik tekseris bastaldy. Bul derek Amangeldi aýdandyq ishki ister bóliminde tirkelgen.