Kóptegen ǵylymı tujyrymdarǵa súıensek, dinge senbeıtin pendelerdiń búkil ǵumyry ýaıym men qaıǵyǵa, qorqynysh pen úmitsizdikke toly bolady eken. Sonymen qatar, ondaı adamdardyń aǵzalary túrli aýrýlarǵa qarsy turý qabileti nashar, ıaǵnı ımýnıteti tómen, psıhosomatıkalyq jaratylysy álsiz bolady. Sol sebepti, dinge senbeıtin adamdar tándik jaǵynan tez qartaıady.

Óıtkeni, únemi bolatyn alań-daýshylyq, sharasyzdyq, úmitsizdik, tynyshsyzdyq aǵzaǵa jáne jan-dúnıege óziniń keri áserin tıgizbeı qoımaıtynyn medısına mamandary da rastaıdy.

Al dinge boıusynatyndar rýhanı turaqty, psıhologıasy tózimdi, qıynshylyqqa sabyrly ári salmaqty bolyp keledi. Sondaı-aq, táni de uzaq ýaqytqa deıin óziniń jastyq qalpyn saqtap qalady. Densaýlyqtary kóbinese myqty bolady.

Negizinen, shynaıy senim degenimiz – ómirdegi barlyq jaǵdaılardan tek jaqsylyqty kóre bilý, al qıynshylyq – ol Allanyń synaǵy dep qabyldaý ekenin esten shyǵarmaýymyz kerek. Sonda adam alańsyz, tynysh ári beıbit ómir súredi.

Dinge senbeıtin jandar keı jaǵdaılarda qıynshylyqtarǵa tóze almaı, rýhanı júdep, túrli dertke, rýhanı aýrýlarǵa, uıqysyzdyqqa tap bolyp, tipti nashaqorlyqqa, maskúnemdikke salynyp jatady. Keıbiri ómirden túńilip, óz-ózderine qol jumsaıdy.

Qazirgi kúni kóptegen medısına mamandary adamdardyń ártúrli jaman joldarǵa, sýısıdke barýynyń aldyn-alatyn birden-bir jol – Qudaıǵa degen senim ekenin aıtyp keledi. Ol úshin biz jas jetkinshekterge dinı tálim-tárbıe berip, boılaryna ımandylyqtyń dánin egýimiz qajet.

«Kimdi durys jolǵa salǵysy kelse, Alla onyń kókiregin Islam úshin keń ashady. Al kimdi azdyrǵysy kelse, onyń kókiregin taryltqany sonsha, (Islam dinine sený-ılaný) olar úshin taýǵa shyǵýdan da qıyn seziledi. Alla ımansyzdardy osylaı qınaıdy» («Ánǵam» súresi, 125-aıat).

Derekkóz: Islam.kz