Sport týraly jańa zańnyń jobasynda ulttyq sport túrlerin qarjylandyrýdy da qarastyrý kerek. Bul týraly búgin Májilistiń jalpy otyrysynda depýtat Bekbolat Tileýhan aıtty, dep habarlaıdy «Qamshy» portaly Sputnik Qazaqstan agenttigine silteme jasap.

 "Ulttyq Olımpıada komıtetine memlekettik búdjetten qarajat alý quqyǵy berilmek. Saralaý qaǵıdalaryna negizdele otyryp, olımpıadalyq sport túrleri boıynsha federasıalar arasynda aqsha bólinedi ǵoı. Endeshe joǵary jetistikteri bar ulttyq sport túrlerin osy saralaý nátıjesi boıynsha sporttyń basym túri dep aıqyndaýǵa bolady. Qazir amerıkalyqtar kókpar tartyp jatyr, bir jarym mıllıard qytaılar bizdiń aýdaryspaqty moıyndady. Dúnıejúzilik toǵyzqumalaq federasıasy qurylǵanyn bilesizder. Reseı, Qytaı, AQSH qazaqtyń ulttyq sport túrlerin moıyndap jatyr", — degen depýtat ulttyq sport túrlerine de kóńil bólip, qarjylandyrý qajettigin alǵa tartty. 

Óz kezeginde Mádenıet jáne sport mınıstri Arystanbek Muhamedıuly  tek olımpıadalyq sport qana emes, ulttyq sport túrlerin damytý da erekshe nazarda ekenin atap ótti. 

 "Durys aıtasyz, keıbir óńirler ulttyq sportqa kóńil bólmeıdi. Saralaýǵa kirgizsek, jergilikti atqarýshy organdar ulttyq sportty damytýǵa qarajat bóledi. Budan bólek, mınıstrliktiń baǵdarlamasynda ulttyq sportty damytý boıynsha birneshe aýqymdy sharalardy belgilep otyrmyz. Mysaly, EKSPO kórmesi aıasynda ulttyq sport túrlerinen úlken halyqaralyq jarystar ótedi. Ulttyq sportqa sheteldikter qyzyǵýshylyq tanytyp jatqany ras. Osy baǵytta jumysty jalǵastyramyz", — dedi Muhamedıuly.