Elbasy Konstıtýsıalyq reformalar jobasyna qatysty usynystardy jınaqtaý, pysyqtaý, taldaý jáne talqylaý jóninde jumystyń qyzý júrgenin aıtty, dep habarlaıdy Aqordanyń baspasóz qyzmeti.

"Ózimniń konstıtýsıalyq quqyǵymdy paıdalana otyryp, men referendýmǵa shyǵarmaı-aq, Parlamentte talqylaý arqyly Negizgi zańǵa ózgerister engizý týraly sheshim qabyldadym", – dedi Qazaqstan prezıdenti.

Nursultan Nazarbaev engiziletin ózgeristerdiń bári elimizdiń damýyna erekshe serpin beretinin jáne bul qadam biz úshin mańyzdy ekenin aıtyp ótti.

"Biz Qazaqstannyń saıası modeli – prezıdenttik respýblıkany saqtap qalatynymyzdy aıtyp ótkenimiz jón. Memlekettik basqarý júıesi zaman talabyna saı ıkemdi bolýy tıis. Júrgizilgen reformalar nátıjesinde bılik ókilettikteriniń bir bóligi bıliktiń bir tarmaǵynan ekinshisine berilip, ókildi organdardyń Úkimet pen atqarýshy organdarǵa qatysty júrgizetin baqylaý fýnksıalary kúsheıtiletin bolady, bul olardy kásibılendirýge jáne halyq bıligi qaǵıdattaryn bekitýge baǵyttalady. Bizge halqymyzdyń bolashaǵy úshin mańyzdy qujat máselesin sheshý kerek, búkilhalyqtyq talqylaýdyń qorytyndysyn shyǵaryp, ony Parlamenttiń qaraýyna engizý merzimin anyqtaý qajet. Konstıtýsıanyń 23 babyna jáne zańdarǵa 35 ózgertý engiziletini belgili boldy. Engiziletin ózgeristerdiń basty máni – Prezıdenttiń birqatar ókilettikterin bıliktiń basqa tarmaqtaryna qaıta bólý", – dedi Elbasy.

Memleket basshysy basqarýdyń prezıdenttik modeliniń tabystylyq faktoryna, sonyń arqasynda elimizdiń álemdik qoǵamdastyqta tanymal bolǵanyna, halyqtyń ál-aýqatynyń artyp, ony budan ári jaqsartý jóninde josparly jumystar júrgizilip jatqanyna qatysýshylardyń nazaryn aýdardy.

"Elimizde iske asyrylyp jatqan Bes ınstıtýsıonaldyq reformaǵa jáne Qazaqstan halqyna arnalǵan jańa joldaýǵa sáıkes, respýblıkamyzdyń saıası júıesi de naqty ózgeristerdi qajet etip otyr", – dedi Nursultan Nazarbaev.

Sondaı-aq, búkilhalyqtyq talqylaýǵa shyǵarylǵan Qazaqstan Respýblıkasy Konstıtýsıasynyń qoldanystaǵy redaksıasynda menshik quqyǵyna qatysty 26-bapqa usynylǵan túzetýler talqylandy. Jumys toby músheleri atalǵan normaǵa usynylǵan ózgeristerge qatysty halyqtan túrli usynys túskeni týraly aıtty.

«Konstıtýsıanyń aty Konstıtýsıa. Tıisti konsensýs bolýy kerek. Qazaqstan azamattarynyń pikirin eskerip, 26-bapqa ózgeris engizbeýdi usynamyn. Zańnamany jetildirý jáne onyń negizgi erejelerin túsindirý sharalaryn odan ári jalǵastyrý qajet»,-dedi Nazarbaev.

Sońynda Nursultan Nazarbaev usynylǵan túzetýlerdi talqylaý barysynda el azamattary joǵary belsendilik tanytqanyn aıta kelip, aldaǵy reformanyń mańyzdylyǵy men ózektiligin taǵy bir márte atap ótti.

"Memleket qurylymyna usynylǵan ózgerister qoǵamymyzdy demokratıalandyrý isin kúsheıtip, halyq bıliginiń negizin odan ári nyǵaıtýǵa, parlamenttiń rólin, úkimettiń prezıdenttik basqarý nysany aldyndaǵy derbestigi men jaýapkershiligin arttyrýǵa baǵyttalǵan. Reformanyń túpki máni de osynda jatyr. Buǵan qosa, quqyq qorǵaý jáne sot júıesi qyzmetiniń konstıtýsıalyq negizi jańǵyrtylady, konstıtýsıalyq qadaǵalaý júıesi jetildiriledi. Konstıtýsıalyq qurylymymyzdyń myzǵymastyǵyna degen kepildik te bekem bola túsedi. Jaqyn arada Konstıtýsıaǵa engiziletin ózgerister jobasy Parlamentke talqylaý úshin usynylatyn bolady", – dedi Qazaqstan Prezıdenti.

Otyrysty qorytyndylaǵan Memleket basshysy jumys tobynyń barlyq múshelerine tabysty jáne mańyzdy tarıhı jumystary úshin alǵys aıtty.