Ulttyq bank basshysy Danıar Aqyshevtyń aıtýynsha, aqpan aıynda valúta baǵamynyń kúrt ózgerip, teńgeniń nyǵaıýyna birneshe faktor áser etti, dep habarlaıdy QazAqparat
Bir aı ishinde teńgeniń AQSH dollaryna qatysty aıyrbastaý baǵamy 3,5%-ǵa, al jyldyń basynan beri 6,2%-ǵa nyǵaıdy. Aqpannyń sońynda qalyptasqan bir AQSH dollary úshin 312,76 teńge bolǵan baǵam 2015 jylǵy jeltoqsannyń ekinshi jartysynan bergi eń joǵary kórsetkish bolyp tabylady.
«Teńgeniń kúsheıýine birneshe sebep bar. Birinshiden, munaıdyń álemdik baǵasy áser etti. Bir bareldiń baǵasy 55 dollardan joǵary bolyp saqtaldy. Bárimiz jaqsy bilemiz, oǵan OPEK jáne basqa munaı óndirýshi elderdiń jasalǵan ýaǵdalastyqtary, sonyń ishinde munaı óndirý kólemin shekteý boıynsha ortaq kelisimder de áser etti», - dedi Aqyshev aqpannyń aldyn ala qorytyndylaryna jáne valúta naryǵyndaǵy jaǵdaıǵa arnalǵan búgingi brıfıńte.
Budan bólek, Ulttyq bank basshysy aqpannyń ekinshi jartysynan bastap valúta naryǵyndaǵy shetel valútasynyń suranysy men usynysyna nendeı faktorlardyń áser etkenin túsindirip berdi. Onyń aıtýynsha, bul «salyqtyq apta» dep atalatyn maýsymdyq faktor.
«Ondaıda eksporter kásiporyndar valútanyń biraz bóligin satyp, sol aqshaǵa salyq tóledi. Osynyń nátıjesinde valútaǵa degen usynystar kúrt kóbeıdi. Dál osy jaǵdaı da teńgeniń nyǵaıýyna áser etti. Al «salyq aptasynyń» aıaǵyna qaraı teńgeniń baǵamy rettele bastady. Ony bárińiz baıqaǵan shyǵarsyzdar. Naýryz aıynda birshama ózgerister bolýy ábden múmkin. Alaıda teńge baǵasy kúrt ózgermeıdi. Ony munaıdyń álemdik baǵalary ustap turatyn bolady. Sondyqtan valúta baǵamy qatty qubylady dep aıtý qıyn», - dep atap kórsetti Ulttyq bank tóraǵasy.
