Qys. Bul mezgil aq ulpa qarymen, keıde qytymyr sary aıazǵa tońdyryp ábigerge salǵan sátterimen barshamyzdyń esimizde qalatyny sózsiz. Degenmen qaqaǵan qańtar men aqyrǵan aqpannyń aıazynan keıin, jer betine jaıma shýaq jylylyǵymen kókteı jaınap kóktem keletini belgili. Mine, osy bir adamzatqa qýanyshyn arqalap keletin kóktemniń alǵashqy kúni, qys mezgilin shyǵaryp salý úshin, Qostanaı qalasynyń ortalyǵynda ornalasqan «Dala hall» restoranynda umytylmas merekelik qaıyrymdylyq is-shara ótti.
Ol bilim oshaǵynyń qara shańyraǵy salatyn, elimizde on úzdik joǵary oqý oryndarynyń qataryna kiretin Ahmet Baıtursynov atyndaǵy Qostanaı memlekettik ýnıversıteti men Qazaqstan Respýblıkasy İshki ister mınıstrligi Shyraqbek Qabylbaev atyndaǵy Qostanaı akademıasynyń birlesip uıymdastyrǵan «Qysqy ertegige saıahat» atty stýdentter men kýrsanttardyń qysqy bal merekelik kınofestıvali edi.
Qysqy bal osymen qatarynan 6 jyl oblysymyzdaǵy aýyr dertke shaldyqqa búldirshinderge qol úshin berý úshin, qaıyrymdylyq túrinde uıymdastyrylyp keledi.
Atalmysh jobanyń avtory A. Baıtursynov atyndaǵy Qostanaı memlekettik ýnıversıtetiniń qyzmetkeri, Qostanaı oblysyna belgili uıymdastyrýshy, shoýmen Bolat Nazmyshuly Qalıev. Jasta bolsa qolynan is keletin Bolattyń eńbegi qazirgi qoǵamdaǵy jastarǵa aıtarlyqtaı úlgili bolary sózsiz. Qaıyrymdylyq shara dep otyrǵan sebebim, osy is sharadan túsken qarajat oblysymyzdaǵy qarjyǵa muqtaj, ómir tálkegine ushyrap, jan balasyna qarjy taba almaı otyrǵan otbasyǵa arnaıy túrde tabys etiledi.
Mine, bıylǵy uıymdastyrylyp otyrǵan qysqy baldyń óz ereksheligi bar. Óıtkeni bıylǵy sharanyń aýqymyn keńeıtý úshin bizdiń oqý ornymyzdyń kýrsanttaryn arnaıy shaqyrtyp, kópshilikke úlgi retinde «áskerı váls» bıin usyndy. Jáne de bıylǵy shara Qazaqstan Respýblıkasy Qarýly kúshteri men polısıanyń 25 jyldyǵyna arnaldy.
Saltanatty keshke Qostanaı oblysy ákimdiginiń mádenıet basqarmasynyń bastyǵy Erlan Qalmaqov, Qostanaı oblysy ákimdiginiń jastar saıasaty máseleleri jónindegi basqarmasynyń jetekshisi Kenesh Álimjanov, Akademıa bastyǵy polısıa polkovnıgi Mırlan Qyzylov jáne ýnıversıtettiń prorektory Jeńis Jarylǵasov jáne qazylar alqasynyń qurmetti qonaqtary qatysty.
Qysqy balǵa arnaıy qurmetpen shaqyrylǵan Akademıa bastyǵy polısıa polkovnıgi Mırlan Ahmedıauly Qyzylov qysqy baldyń saltanatty ashylýynda óz quttyqtaý sózin tómendegideı qýanyshty sezimmen jetkizdi;
- Mundaı jastardyń mańdaı terimen daıyndalǵan aýqymdy is shara árıne, bárimizdi beı-jaı qaltyrmaıtyny sózsiz. Qoǵamdaǵy jastardyń búgingi qaıyrymdylyq naýqanyn uıymdastyryp otyrǵanyna óz basym rızashylyǵymdy bildiremin. Qandaı keremet juptary jarasqan jastar, kıim úlgileri qutty ertegidegi hanshaıymdar men hanzadalardyń klasıkalyq kıimderi tárizdi. Sizderdiń uıymdastyryp otyrǵan keshterińizdi kórip, ertegi álemine saıahat shekkendeı áserdemin. Atynyń ózi aıtyp turǵandaı bari tańǵajaıyp. Bul is sharany ózimizdiń oqý ornymyz Akademıa qabyrǵasynda da jalǵasyn tabatynyna senimdimin, – dedi.
Sahyna tórine nysandyq kıim úlgisinde aq kúrte, qara shalbar kıgen kýrsanttar men qyzyl tústi keshki kóılek kıgen ýnıversıtettiń stýdentteri birigip, «áskerı váls» bıin bılep, kórermenderdiń ystyq yqylasyna bólendi. Tipti keýdelerinde patrıottyq sezim oty oıanǵan jastar bı aıaqtalysymen uzaq ýaqyt ystyq yqylaspen qol shapalaqtap, juptary jarasqan qyz – jigitterge qoshemetterin aıamady.
Qysqy bal ári qaraı ýnıversıtettiń 7 fakúlteti daıyndaǵan kınofestıvalge jalǵasty. Kınofestıval dep otyrǵan sebebi, álemge áıgili kınolardyń mýzykasyna stýdentter bılep, óner kórsetedi. Bıdiń basy qazaqtyń «anaǵa aparar jol» kórkem fılminiń mýzykasyna bıleýden bastalyp, álemge belgili «garı potter» fılminiń mýzykasymen súıemeleýden aıaqtaldy.
Úsh saǵatqa sozylǵan konserttik baǵdarlamaǵa 500-den astam stýdentter jáne shaqyrylǵan qurmetti qonaqtar qatysty.
Kesh óte áserli bolǵany sondaı bizdiń kýrsanttar óte tamasha sezimmen oralyp, ýnıversıtet ujymyna alǵystaryn aıtýdy da umyt qaldyrmady.
