Qazaqstannyń joǵary oqý oryndarynda oqytylatyn mamandyqtarǵa qatysty Ábdýáli Haıdar men Shora Sarybaev bastaǵan bir top zıaly qaýym ókilderi B.Saǵyntaevqa, M.Tájınge, G.Ábdiqalyqovaǵa hat joldady, dep habarlaıdy "Qamshy" portaly.

«QR BǴM daıyndaǵan joǵary jáne joǵary oqý ornynan keıingi bilim berý mamandyqtarynyń 01.02.2017 jyly kúshine engen Tizbesinde «Qazaq tili», «Qazaq ádebıeti», «Ádebıettaný», «Lıngvısıka», «Qazaqstan tarıhy», «Shyǵystaný», «Túrkologıa» mamandyqtary joq bolyp shyqty», - dep jazylǵan atalmysh hatta.

Ábdýáli Haıdar bastaǵan bir top zıaly qaýym ókilderi tilimiz ben ádebıetimizdiń bolashaǵyna degen alańdaýshylyǵyn bildirip, olarǵa tikeleı qatysty mamandyqtardy joıýdyń saldary ádebıetimizdiń qurdymǵa ketýine ákep soqtyratynyn eskere ketken.

Osy máselege qatysty BǴM mınıstri Erlan Saǵadıevke qarsy narazylyq sharalary júrgizilip, qoǵam belsendileri áleýmettik jelide Saǵadıevtiń otstavkaǵa ketýin talap etip, odan ornyn bosatýyn surap jarysa jazýda. Halyqtyń bul narazylyǵyna mınıstr Saǵadıev:

"Mundaı arandatýshy suraqtar qoımańyzdar. Ony sheshetin Prezıdent. Prezıdent aıtsa ketemin", — dep jaýap berdi.

Esterińizge sala ketsek, Erlan Saǵadıev tizginin ustap otyrǵan Bilim jáne ǵylym mınıstrligi «Qazaqstan Respýblıkasyndaǵy joǵarǵy jáne joǵarǵydan keıingi bilim berý mamandyqtarynyń klasıfıkatory» degen qujatynyń jańa nusqasyn 01.02.2017 jyly qoldanysqa engizgen edi. Atalmysh qujatta BǴM mınıstrligi «Qazaq tili» men «Qazaq ádebıeti» mamandaryn daıyndaýdan bas tartqan. Aqordaǵa hat jazǵan bir top zıaly qaýym mınıstr Saǵadıevtiń bul qylyǵyn qazaq ultyn, qazaq tili men ádebıetin joıýǵa baǵyttalǵan bastamasy retinde túsinip, óz talaptary men tilek-ótinishterin alǵa tartqan.

«Álemdik kóshbasshy Garvard, Kembrıdj, Oksford, Kolýmbıa, Amsterdam ýnıversıtetterinde «Aǵylshyn tili», «Ádebıettaný», «Lıngvısıka», «Tarıh», «Shyǵystaný», «Túrkologıa» mamandyqtary mindetti bolyp tabylady.

Qazaq tili, Qazaq ádebıeti, Ádebıettaný, Lıngvısıka, Qazaqstan tarıhy, Shyǵystaný, Túrkologıa, Shyǵystaný syndy ǵylym salalary – halqymyzdyń, qoǵamymyzdyń rýhanı qundylyqtary», - dep hat avtorlary óz pkirlerin jetkizedi.

Alaıda, mınstr Saǵadıev bul týraly estimegenin aıtyp, alypqashpa áńgimelerge senbeýge shaqyrady.