Apta basynda Qazaqstannyń Polshadaǵy elshisi Altaı Ábıbýllaev qyzmetinen bosatyldy. Memlekettik hatshy Gúlshara Ábdiqalyqova onyń memlekettik qyzmet týraly zańnamany buzdy dep aıyptap, Memleket basshysynan shara qoldanýyn suraǵan bolatyn. Artynsha, Prezıdenttiń jarlyǵymen Ábıbýllaev elshi qyzmetinen bosatyldy, dep habarlaıdy Skifnews.kz
Alaıda, G.Ábdiqalyqova memqyzmetker etıkasy naqty qalaı buzylǵanyn sol kúıi aıtqan joq. Iaǵnı, óziniń ultjandyǵymen, saýattylyǵymen kózge túsip úlgergen Altaı Ábıbýllaevtyń naqty ne úshin jumystan ketkeni halyqqa belgisiz. Jumys ornyna mas bop keldi me, esirtki qoldandy ma, qumar oıyn oınady ma, bálkim Astanadan kelgen joǵary laýazymdy áıelderdiń kóńilin taba almaǵan bolar? Bul jaǵyn Aqordanyń birde-bir ókili ashyp aıtpaı otyr.
Resmı ókilder ashyq málimdemese de, sol Syrtqy ister mınıstrliginiń mańaıynda júrgen "uzynqulaqtar" máseleniń mán-jaıyn "sybyrlap" úlgerdi. Estýimizshe, Ábıbýllaevtyń jaýapkershilikke tartylýyna oryssha sóılemeýi sebep bolǵan. Tarqatyp aıtsaq, Polshadaǵy kásipkerlermen kezdesken Qazaqstan elshisi baıandamasyn qazaq jáne polák tilderinde jasaǵan eken. Alaıda, buǵan shamdanǵan orystildi orta baıandamany oryssha jasaýyn talap etken. Al, Altaı Ibragımuly bul talapty oryndaýdan bas tartypty. Sodan onyń artyna "sham alyp túsip", aqyry jumystan ketýine qol jetkizgen kórinedi.
Árıne, bul tek sybys qana. Máseleniń naqty mán-jaıyn Qazaqstannyń bılik ókilderi resmı aıtyp beredi degen úmittemiz.
Tanymal saıasattanýshy Rasýl Jumaly da Ábıbýllaevtyń memqyzmetkerdiń etıketin buzatyndaı saýatsyz emes ekenine kúmandanbaıdy.
"Altaı Ábıbollaev saýatty da memleketshil, qolynan is keletin elshilerdiń biri. Ne úshin mansaptan aıyrdy? Sebebi nege aıtylmaıdy? Sonysyna qaraǵanda arandatý áreketi sıaqty. Kezinde dıplomat bolǵanda meniń de artymnan talaı aryz jazylǵan bolatyn "agashkalarǵa" bas ımegenim úshin. Soǵan uqsaıdy. Qalaı bolǵanda ókinishti jaǵdaı kásibı mamandardyń qýdalanyp, pátýásiz yǵaı-syǵaıdyń saltanat quryp otyrǵany. Kerisinshe bolý kerek", - dep jazdy saıasattanýshy óziniń Facebook-paraqshasynda.
