Facebook áleýmettik jelisinde qazaq ártisi Tuńǵyshbaı Jamanqulovty qorǵap, oǵan qatysty sot isiniń bastalǵandyǵyna narazylyq bildirip pikir aıtyp jatqandar kóp, dep habarlaıdy "Qamshy". Solardyń biri áleýmettik jeli belsendisi Qadyrǵalı Kóbentaı.
"Kúnine eki ret jańalyqtar qaraımyn. Ógeı bolsam da, jer basyp júrgesin, amal joq, osy qoǵamnyń múshesimin ǵoı degen oı ǵoı baıaǵy..
Kezekti jańalyktarymdy tyńdaı qoıaıyn dep, teledıdardy qosyp qalsam:
- Tuńǵyshbaı Jamanqulovtyń isine baılanysty, sot otyrysy bastaldy!-deeep, saırap otyr dıktor. Masqara!
Myna qoǵam Jamanqulovty sottamaqshy ma sonda?.. Tuqańdy sottaý.. ónerdi qorlaý ǵoı bul!?
Aqyry kereń bolmaǵasyn, ár nárseni tyńdaısyń ǵoı.. Bir jyldary T. Júrgenov atyndaǵy Óner akademıasynyń bir rektorynyń: "Jamanqulov nashar pedagog.."- degenin de estip edik. Sonda.. biz kimnen oqydyq? Kimnen tárbıe aldyq? Qazaq teatrlarynyń betke ustar akterleriniń jetpis-seksen paıyzy Tuqańnyń shákirtteri! Qalaberdi ónerdiń basqa salalarynda da talaı shákirtteri júrmiz. Sonda kim nashar? Já.. qoıshy, pendeshilik qoı dedik onda da..
Danyshpan Abaı : "Qazaqtyń ólgeniniń jamany joq, tirisiniń ósekten amany joq!" - deıdi. Biz, shynymen, sondaı halyqpyz ba? Ólgenin ókirtip maqtaıtyn, tirisin aqtaı da almaıtyn ultpyz ba? Aıran ishkeni qutylyp, shelek jalaǵany tutylǵan qoǵam ba bul? Qaıda álgi.. jarqyraǵan "juldyzdardy" jatyp jazatyn jazǵyshtar? Qatynynyń eteginen syǵalap, eldi aıtaqtaıtyn "batyrlar" qaıda?
- Oý, aǵaıyndar!
Keshegi jeltoqsan kóterilisinde jastardy qorǵaımyn dep, alańǵa shyǵyp, mańdaıynda kúrektiń izi qalǵan (áli kúnge deıin) Jamanqulov emes pe ol?! Aqyn-jazýshylardy sheshendigimen, sóz saptaýymen tańǵaldyrǵan Tuńǵyshbaı emes pe ol?! Qazaqtyń qarakóz ul-qyzdarynyń talantyn tanyp, tárbıelep, óner dodasyna, sahna dodasyna baptap qosqan Ustaz emes pe ol?! Ótteri jarylyp ketse de aıtaıyn, qazaq handaryn Tuqańdaı somdaǵan akter joq áli.
Talaı tektilerimizdi temir torǵa toǵytyp, táýirlerin taptatyp, attyryp, astyryp, shaptyrýdan atymyz shyqqan ult edik, sol ádetimiz áli qalmaǵan ba? Bir talantty aqtaı almaıtyn qandaı halyqpyz biz?
- Beý, Aǵaıyndar!
Oıanaıyq, bas kótereıik! Tulǵa talantymyzdy taptatpaıyq teksizderge!", - deıdi Qadyrǵalı Kóbentaı.
Sonymen qatar Tuńǵyshbaı Jamanqulovtyń isine qatysty Kamal Uzaqov ta óz pikirin áleýmettik jelide jazyp qaldyrdy.
"QR halyq ártisi, profesor, memlekettik syılyqtyń laýreaty, akter ári ustaz Tuńǵyshbaı Jamanqulovtyń abyroıyn saqtap qalý búgingi urpaqtyń qolynan kelmese, onda qazaqqa, qazaqtyń ónerine jaǵylǵan kúıe, súıegine basylǵan tańba bolary sózsiz. Keleshek urpaqtyń ózge jurt aldynda ónerimiz jaıly aıtýyna kedergi keltireri anyq.
Óner - memleket betperdesi.
Ónerimizdi dáriptep, bolashaq urpaqqa jetkizýge mańdaı terin tógip, óner jolynda tap kelgen qıyndyqtardy jeńip, ystyǵymen sýyǵyn, ashysymen tushshysyn birdeı qabyldap, myńdaǵan shákirt tárbıelep kelgen arystaı azamatymyzǵa kúıe jaǵý QAZAQqa kúıe jaǵýmen birdeı.
17.000.000 qazaqtyń ishinde 17.000 Tuńǵyshbaı joq, ol bireý ǵana.
Mańdaıymyzǵa bitken arysymyzdyń bedelin túsirmeı, abyroıyn saqtap qalaıyq!" - dep jazady áleýmettik jelidegi paraqshasynda.
