Kúlli álemdi ǵajaıyp daýysymen, oryndaýshylyq sheberligimen tánti etken Dımash Qudaıbergenniń ár eldegi jankúıerleri Astanada bas qospaq.

Onyń negizgi uıymdastyrýshysy – Qazaqstanda resmı túrde tirkelgen tuńǵysh fan-top – «Dimash@Dostar».

Qandaı da bir fan-toptardyń bas qosý sharasy Qazaqstanda buryn-sońdy ótkizilgen joq edi. Jáne jankúıerlerdiń zańdy tulǵa retinde tirkelýi de Qazaqstanda tuńǵysh ret bolyp otyr.

AQSH, Germanıa, Qytaı, Reseı, Ýkraına, Japonıa, Qyrǵyzstan elderindegi fan-top músheleri Dımash Qudaıbergenovtiń konsertinen bir kún buryn osy keshke qatysady. AQSH-tyń Arızona shtatynan kelgen AQSH-taǵy «Dımash fan-tobynyń» jetekshisi Alısa Kellog óz kóliginiń nomerin arnaıy sertıfıkatpen «DIMASH» dep alypty. Onyń kóshirmesin ánshige keshe tabys etti. Alısa Kellog eshqashan shet elge shyǵyp kórmegen eken. Oǵan sebep – ushaqtan qatty qorqatyndyǵy. Biraq, osy joly Dımashtyń konsertin kórý úshin táýekelge bel býyp, muhıttyń arǵy jaǵynan 14 saǵat ushyp kelipti.  

Dımashtyń jáne qazaqtyń án ónerine degen qurmetteriniń belgisi retinde 26-maýsym kúni bas qosqaly otyrǵan fan-top ókilderi – ár eldegi ár túrli jáne ár jastaǵy mamandyq ıeleri. Olardyń qatarynda dárigerler de, til mamandary da, zeınetkerler de, stýdentter de bar. Olar osy keshte halyqtar arasyndaǵy dostyqqa ónerdiń yqpalynyń erekshe ekendigin pash etpek. Osyǵan deıin tek ǵalamtor arqyly habarlasyp, syrttaı tanys bolǵan olar sol kúni bir-birimen júzbe-júz kórisip, pikir alysady. Keler kúnderge jospar qurady.