Oblys ákiminiń orynbasary Jaqsylyq Omardyń tóraǵalyǵymen koordınasıalyq keńestiń múgedekter máseleleri jónindegi kezekti otyrysy ótti. Jınalys barysynda oblystyq jumyspen qamtý jáne áleýmettik baǵdarlamalar basqarmasynyń jetekshisi Z.İlimjanova negizgi baıandamasyn oqyp, Múgedekterdiń quqyǵy jónindegi konvensıanyń qaýlysynyń oryndalý barysy jaıly habarlady, - dep habarlaıdy Qamshy aqparattyq agenttigi Tengrinews.kz saıtyna silteme jasap.
Baıandamashynyń aıtýynsha, statısıkalyq málimetterge qaraǵanda, oblysta múmkindigi shekteýli 61,1 myń adam turady. Olardyń 53 paıyzy nemese 32,4 myńy 1-2 toptaǵy múgedektigi bar adamdar, 7,1 myń adam nemese 11,7 paıyzy múgedek balalar. Múmkindigi shekteýli adamdarǵa túrli reabılıtasıalyq jáne qoldaý sharalaryn kórsetý maqsatynda jyl saıyn búdjetten qarajat bólinedi. Máselen, 2016 jylmen salystyrǵanda 2017 jyly múdegekterdiń reabılıtasıasyna bólinetin qarajat somasy eki esege ósti - bul 2,8 mıllıard teńge. 2012-2014 jyldary aralyǵynda múgedekterge shekteýsiz orta jasaý maqsatynda áleýmettik ınfraqurylymnyń 2117 nysany pasporttandyryldy. Olardyń birinshi kezektegi óńdeýge jatatyn 400-ine oblys búdjetinen 266,0 mıllıon teńge bólindi. Olardyń 40-y bıyl adaptasıalanady. 2017 jyldyń 1 maýsymyndaǵy jaǵdaıy 375 nysanda adaptasıa tolyqtaı júzege asyryldy, bul 93,8 paıyz. Z.İlimjanova sóz sóıleý barysynda múgedekterdi jumyspen qamtý, sýrdoaýdarma mamandarynyń qajettiligi, sondaı-aq, múgedekterden túsip jatqan shaǵymdarmen jumys isteý barysy týraly máselelerdi aıtyp berdi.
Osydan keıin sóz "Nur Otan" partıasynyń oblystyq fılıalynyń tóraǵasynyń orynbasary Ǵalıasqar Sarybaev sóz alyp, partıanyń "Shekteýsiz bolashaq" jobasynyń júzege asý, múmkindigi shekteýli azamattarǵa shekteýsiz orta qalyptastyrý joldary týraly máselelerine toqtaldy, sondaı-aq, ol uıymdary men memlekettik organdardyń erekshe kútýdi qajet etetin balalarǵa ınklúzıv bilim berý jumysyn baqylaý qorytyndylaryn tanystyrdy.
Sonymen qatar, jıyn barysynda Múgedek jáne aqyl-esi, dene bitiminiń kemistigi bar balalarǵa qamqorlyq kórsetýshi ata-analardyń "Alpamys" asosıasıasy qoǵamdyq birlestiginiń ókili Raıhan Sısekenova sóz sóıledi.
Jıyndy oblys ákiminiń orynbasary Jaqsylyq Omar qorytyndylady.
"Shekteýsiz ortany qalyptastyrý nysandarynyń adaptasıasy máselesin jáne ınklúzıv bilim berý sapasyn árdaıym baqylaýda ustaý qajet. Inklúzıv bilim berý balabaqshalary men mektepteriniń Jol kartasyn jasańyzdar. Múgedekterge qoldaýǵa, reabılıtasıa júrgizýge jáne ózge de sharalarǵa bıyl shamamen 3 mıllıard teńge bólindi. Koordınasıalyq keńestiń árbir múshesi osy qarajattyń ıgerilýin jáne kórsetilip jatqan qyzmetterdiń sapasyn árdaıym baqylaýda ustaýy kerek. Múgedekterden túsip jatqan shaǵymdarǵa saraptama júrgizińizder, nelikten keıbir shaǵymdardyń bir taqyrypta túsip jatqanyn anyqtańyzdar. Olardyń árqaısysy boıynsha qandaı sheshim qabyldanyp jatqanyn baqylaý qajet. Múmkindigi shekteýli adamdardyń jumyspen qamtylýy boıynsha naqty josparymyz bolýy shart. Buǵan óńirdegi bıznes-ortanyń ókilderin de tartý kerek", - dedi Jaqsylyq Omar.
