Aqtóbede turatyn 71 jastaǵy Lıdıa Jıtneva Ýkraınada ómirge kelgen. Qazaqstanǵa qonys aýdarǵanyna 40 jyldan asyp ketipti. 90 jyldardyń bas kezinde bolǵan qatty sý tasqyny onyń búkil qujattaryn shaıyp ketken. Sodan beri ol esh qujatsyz ómir súrip keledi, dep habarlaıdy Qamshy aqparattyq agenttigi 31 arnaǵa silteme jasap.

Lıdıa Jıtneva 25 jyldan beri qujattaryn qalpyna keltire almaı júr. Ol kezde olar lashyq sekildi úıde turyp jatqandyqtan, múlikteri men qujattaryn sýdan qutqaryp qala almaǵan. Osy ýaqyt ishinde ol óz erkimen Ýkraınaǵa da hat jazǵan.

Qazir qart áıel zeınetaqy almaıdy, zańdy túrde dárigerge de qaralý quqyǵy joq. Ýkraınada júrgen kezinde shahtada jumys istegen, al Qazaqstanǵa kelip qurylysqa aralasypty. Qazir qyzymen birge jataqhanada turyp jatyr.

Biraq bul baspana da ózderine tıesili emes. Kólemi 80 sharshy metr bolatyn páter onyń burynǵy kúıeý balasynyń menshigi eken. Osylaısha tamyz aıynda páterdi soǵan qaıtaryp bermek.

“Zeınetaqy almaımyn. Qansha hat jazsam da Ýkraınadan jaýap joq. Úıdi ótkizgen soń qaıda turatynymdy da bilmeımin”, – deıdi ol.

Jıtneva mıgrasıalyq polısıaǵa eki jyl buryn shaǵym túsirdim deıdi. Alaıda polıseıler ózderine áıeldiń keshe ǵana kelgenin aıtady.

“Ol qujatyn qalpyna keltirý úshin basqa qujattardy jınaýy tıis. Ol – meken-jaı anyqtamalyǵy, týý týraly kýálik, qyzynyń nemese kúıeýiniń jeke kýáligi. Sosyn biz barlyq jınalǵan qujattardy Ýkraınaǵa jiberemiz”, – deıdi Aqtóbe qalalyq polısıa basqarmasy mıgrasıalyq polısıa basshysy Gúlbaný Muhtarova.

Mıgrasıalyq polısıanyń aıtýynsha, Donbassta qazir bolyp jatqan áskerı qımyldarǵa baılanysty ondaǵy muraǵat qujattary jıi joǵalady, tipti órtenip te ketedi. Sol sebepti ol jaqtan jaýap únemi keshigip keledi eken.