Balqashta jappaı zorlanǵan Nurgúl Qusylbekova kúdiktiler qamaýǵa alynýy úshin bir jyl ýaqyt kúresken. Atyshýly is birneshe ret jabylyp, keıin qaıta qozǵalǵan bolatyn. BAQ-tarda osy is jaıly jarıalanǵan soń ǵana kúdiktiler qamaýǵa alynyp otyr, - dep habarlaıdy Qamshy aqparattyq agenttigi Tengrinews.kz saıtyna silteme jasap.
"Kúdiktilerge qatysty bultartpaý sharasy retinde eki aıǵa qamaýǵa alý týraly úkim shyqty", - dep habarlaıdy Balqash qalalyq sotyndaǵylar.
Jappaı zorlaý oqıǵasy 2016 jyldyń tamyzynda bolǵan. Nurgúl Qusylbekovanyń aıtýynsha, eki er adam ony zıratqa aparyp, jappaı zorlap, kúrekpen uryp-soqqan. Sodan oǵan mola qaza bastaǵan. Abyroı bolǵanda, áıel qashyp shyǵyp, polısıaǵa habar bergen. Alaıda aıǵaqtarǵa qaramastan polısıa bul isti uzaqqa sozyp jibergen, tipti keıin isti jaýyp tastaǵan. Zardap shekken áıeldiń aıtýynsha, istiń jabylǵany jaıly oǵan eshkim de aıtpaǵan. Al sotqa deıingi tergeý barysynda jınalǵan materıaldardyń barlyǵy joǵalyp ketken.
"Maǵan qoǵam men tártip saqshylaryna BAQ arqyly shyǵýǵa týra keldi. Osyǵan deıin men "Ne molchı" qoryna barǵan bolatynmyn. Men úshin bul ońaı bolǵan joq. Osylaısha, men isti qaıta tergeýdi bastadym. Balqashtaǵy tergeýshi eshteńeni de sheshken joq. İstegi materıaldardyń bir bóligi joǵalyp ketken. Onyń da jazalanýyn suraımyn. Muny qalaı túsinýge bolady? Salǵyrttyq?", - deıdi zardap shekken áıel.
"Tergeýshi Rahmetov isti qaıta tergedi, barlyq materıaldy jınady. Oǵan alǵysymdy bildiremin. Kúdiktiler de qamaýǵa alyndy. Osyǵan deıin dalaǵa shyǵýǵa qorqatynmyn. Olardyń jazalanǵanyn qalaımyn. Áıtpese meniń ornymda basqa da áıelder bolýy múmkin ǵoı. Sondaı-aq, Balqashtaǵy tergeýshiniń nelikten osy isti sońyna deıin aıaqtamaǵanyn anyqtaýyn suraımyn", - deıdi Nurgúl Qusylbekova.
Osy ýaqyt boıy, ıaǵnı tergeý kezinde Nurgúl Temirtaýdaǵy daǵdarys ortalyǵynda turdy. Densaýlyǵyndaǵy problemalarǵa baılanysty jumysqa tura almaı júr eken. Nurgúl Qusylbekovanyń aıtýynsha, onyń búıregi aýyrady. Basyn jaraqattap alýyna baılanysty ensefalopatıa (mı derti) mıyndaǵy jasýshalardyń bir bóligi jumys istemeıdi.
