Búgin Almaty oblysynyń ákimi Amandyq Batalov elimizdiń 18 mıllıonynshy turǵyny dúnıege kelgen Taldyqorǵandaǵy Bestibaevtar otbasyna arnaıy baryp quttyqtap, jas otbasyǵa 3 bólmeli páter beriletinin aıtty, dep habarlaıdy Qamshy aqparattyq agenttigi QazAqparatqa silteme jasap.
Elbasynyń atynan nárestege arnalǵan qural-jabdyqtar, atap aıtqanda besik, tósek, besik arba, oıynshyqtar sekildi qajettilikterdi syıǵa tartqan oblys ákimi A. Batalov: «Elimizdiń on segiz mıllıonynshy turǵynynyń Almaty oblysynyń ortalyǵy Taldyqorǵan qalasynda dúnıege kelgeni - bárimiz úshin erekshe qýanyshty oqıǵa. Demografıalyq ósiminiń jyldan jylǵa ulǵaıyp kele jatqany halyqtyń Elbasymyzdyń salıqaly saıasatyna, Qazaqstannyń bolashaǵyna degen seniminiń zor ekenin bildiredi. Jas urpaqtyń alańsyz ósip, bilim alýyna elimizde barlyq jaǵdaı jasalyp keledi. Elbasynyń atynan, Jetisý jurtshylyǵynyń atynan osy aıtýly oqıǵamen shyn júrekten quttyqtaımyn. Kishkentaı náreste aman-saý ósip, er jetip, eldiń abyroıly azamaty bolsyn!» - deı kele, qalada kúzge taıaý paıdalanýǵa beriletin jańa turǵyn úıden jas otbasyna 3 bólmeli páter beriletinin jetkizdi.
Mýslımanyń atasy Erkinbek Bestibaev pen ájesi Bıbitaı Jasybaeva kishkentaı nárestege, jas otbasyna, jalpy óz áýletterine kórsetilgen úlken qurmet pen syı úshin Prezıdentke, oblys basshylyǵyna rızashylyǵyn bildirdi.
«Mýslıma - bizdiń jetinshi nemeremiz. Biz ul-qyzdarymyz ben nemerelerimizdi elge qyzmet etetin, memleketimizdiń damýyna óz úlesin qosatyn bilikti azamat etip tárbıeleýge bar kúsh-jumsaıtyn bolamyz», - dedi Bıbitaı apa.
Sábıdiń anasy Dıana Omarhanova 1991 jyly týǵan, qaladaǵy № 16 mektepte defektolog maman bolsa, ákesi Bestibaev Samat 1982 jyly týǵan, № 5 mektepte dene shynyqtyrý pániniń muǵalimi.
Aıta ketsek, Qazaqstan Respýblıkasy Ulttyq ekonomıka mınıstrliginiń Statısıka jónindegi komıtetiniń málimeti boıynsha, 2017 jyldyń 11 mamyrynda Qazaqstan Respýblıkasy halqynyń sany 18 mln.-ǵa jetip, esep boıynsha Taldyqorǵan qalasynda týǵan Mýslıma Samatqyzy 18 mıllıonynshy turǵyn atanǵan.
