Qazaqstan prezıdenti Nursultan Nazarbaev qandaı da bir nysandy óz esimimen ataýǵa qarsy ekenin aıtty, dep jazady Qamshy aqparat agenttigi.

Elbasy bul týraly «Rossıa 24» arnasyna bergen suhbatynda halyqaralyq áýejaıdy «Nursultan Nazarbaev» dep ózgertý týrasynda áńgime bolǵanda málim etti.

«Bul meniń bastamam emes. Men ondaıǵa qarsymyn. Dál osy másele aldymnan qaıta-qaıta shyǵady. Adamdar atqarylyp jatqan jumysty kórip, meni baǵalaıtyn shyǵar, ol úshin qýanamyn. Degenmen ár saıasatker, ár memleket basshysy óz isimen el esinde saqtalýy tıis», - dedi Elbasy.

Sondaı-aq, Rım ımperatory, fılosof Mark Avrelıanyń aıtaqandaryn esine túsirdi: «Imperatordan «Nege seniń eskertkishiń joq» dep suraǵanda, halyqtyń keıin «bul kimniń eskertkishi» dep suraǵanyn qalaımyn dep jaýap bergen. Menen keıin halyq «oǵan nege áli eskertkish qoıylmaǵan» dep suraýy kerek», - dedi.

Aıta keteıik, 21 maýsym kúni Astana áýejaıy «Nursultan Nazarbaev Halyqaralyq áýejaıy» dep ataldy.  Aqparat jáne komýnıkasıa mınıstri Dáýren Abaev Nursultan Nazarbaevtyń atalmysh sheshimdi qalaı qabyldaýy múmkin ekenin aıtqan.

«Memleket basshysy bul joly túsinistik tanytyp, qoldaıdy dep úmittenemin. Bul óte mańyzdy. Sebebi, «Nurly jol» aıasynda jasalǵan jumysty halyq túsinýi kerek», - dedi mınıstr.

Reseılik «Rossıa-24» arnasy álemdegi eń jas astana – Astana qalasy jaıynda «Qazaqstan bolashaqqa qaraıdy» dep atalatyn arnaıy reportajyn túsirgen. Suhbat barsynyda Elbasy Astanany salý tarıhy jónindegi suraqtarǵa jaýap berip, Qazaqstan elordasynyń tóńiregindegi jasyl aımaqty damytý barysyn áńgimeledi.

Sondaı-aq, Nursultan Nazarbaev reseılik telearna tilshisine elimizdiń bitimgershilik mısıasynyń maqsattaryna, álemdegi qaqtyǵystardy retteý jónindegi Qazaqstan qyzmetiniń nátıjelerine toqtaldy. Budan bólek, Qazaqstan Prezıdenti el ekonomıkasyn jańǵyrtý úderisi jáne ındýstrıalyq-ınfraqurylymdyq damý baǵdarlamasyn iske asyrý nátıjeleri týraly aıtyp berdi.

Sholýshy: Gúlim Jaqan