Aǵylshynnyń Times gazetine suhbat bergen Katar qarjy mınıstri Ali Sharif Al Emadi Katardyń qorqytylmaıtyn óte baı el ekenin aıtqan. Bul týraly BBC túrik qyzmeti jazdy.

Saýd Arabıa, Mysyr, Bahreın, BAÁ sıaqty elder «terorızmge qoldaý jasady» dep aıyptap, Katarǵa ótken aıdan embargo qoıǵan edi.  Al Emadi ondaǵan jyldar boıy tabıǵı gaz satýdan túsken qarjy qorynyń asa baı ekenin aıtqan.

Al Emadi: «Jalpy ishki ónimi — %250 – ǵa teń keletin halyqaralyq kapıtal qoryna ıelik etemiz. Katar ortalyq banki rezervimiz bar. Qarjy mınıstrliginiń de strategıalyq qorlary bar», - dep  eldiń ekonomıkalyq qýattylyǵy týraly egjeı-tegjeıli aıtqan. Ol sondaı-aq óz eliniń ekonomıkasyna, Dohaǵa embargo qoıǵan elderdiń ekonomıkasyn salystyra kelip, ózderiniń qarjylyq negizi áldeqaıda kúshti ekenine nazar aýdartqan.

Al Emadi óz sózinde atalǵan elderdiń tipti aıtarlyqtaı ekonomıkalyq qıyndyqtary bar ekenin jetkizgen. «Bahreın men Mysyrdyń kredıttik skorıngi qoqys deńgeıinde. Saýd Arabıasyna qarasańyz qarjylyq jaǵdaıynyń qıyn ekenin ańǵarasyz. Aımaqtaǵy eń qarqyndy damyǵan el bizdiń elimiz. Ózimizge eń jaqyn Parsy shyǵanaǵy elderiniń yntymaqtastyq keńesindegi Arab ámirlikterinen 40 paıyzǵa tez damyp kelemiz», - degen mınıstr.

Eske sala keter bolsaq, ótken aıda joǵaryda atalǵan tórt arab eli «terorızmdi» qoldady dep aıyptap, Katarǵa embargo qoıǵan. Eki apta buryn atalǵan elder embargonyń kúshin joıý sharty retinde 13 baptan turatyn talap tizimin jarıalaǵan. Talaptyń arasynda Katardaǵy Túrik bazasynyń jabylybýy,  Ál-Jazıra telearnasynyń efırin toqtatý, Iranmen qatynasyn álsiretý, Iemendegi búlikshilerdi qoldaýdy toqtatý sıaqty sharttar bar.  

Doha bul talaptardyń negizsiz ekenin, ózderiniń qalypty qarym-qatynas ornatý úshin dıalogqa ázir ekenin aıtqan. Aıta ketsek, atalǵan jaǵdaı sońǵy 20 jylda shyǵanaqta oryn alǵan eń úlken jaǵdaı bolyp otyr.