3 shildede aptap ystyqtan jaǵdaıy nasharlaǵan balany Fatıma Haızýllany qutqaryp qalǵan. Jolserik bul jaǵdaıdyń qalaı bolǵanyn baıandap berdi dep xabarlaıdy Qamshy aqparattyq agenttigi.

3 shilde kúni Altynaı Rambaeva ádettegideı jumysqa shyqty. Astrahannan Mańǵystaýǵa bet alǵan jolaýshylarǵa jolserik bolǵan ol Maqat stansasyna deıin barlyǵy oıdaǵydaı boldy deıdi. Atalǵan stansaǵa kelip jetken kezde jolaýshylardyń biri kýpede sábıdiń shetinep ketkenin habarlaǵan.

«Maqattan ótkennen keıin ekinshi kýpedegi áıel júgirip kelip sábıdiń kóz jumǵanyn, al anasynyń jylap otyrǵanyn habarlady. Júgirip kelip, náresteniń es-tússiz jatqanyn kórdim. Tynys alýyn, júrek qaǵysyn tekserdim… Bala kók-kómbek bolyp ketken. Sosyn qyzdy ózimniń qyzmettik bólmeme alyp ketip, onyń qaıta tynys alýy úshin barymdy saldym», – deıdi Altynaı Rambaeva.

Jolserik 9 aılyq Fatımaǵa sý shashyp, arqasy men quıryǵynan qaqqan.

«Sol sátte eshteńeden qoryqpadym. Quddy ishimde bir kúsh paıda bolǵandaı, qolymnan kelgenniń bárin jasadym. Ózimniń eki qyzym bar, sondyqtan bul qyzdyń ómir súrgenin qatty qaladym. Al 40 mınýttan keıin esin jıǵan kezde qýanyshtan jylap jiberdim de: “Ómir súr, qanekı, ómir súr”, – dep aıqaılaı berdim. Sodan Qulsary stansasyna jetkenshe birneshe jattyǵý jasadym. Odan keıin qyz tynys alyp, jylaı bastady. Baqytymda shek bolǵan joq», – dep bólisti Altynaı Rambaeva.

Al Qulsaryǵa jetkennen keıin kishkentaı Fatıma men onyń anasy Araı Jalıeva aýrýhanaǵa jetkizildi.