Búkil álemdik boks serıasy WSB jobasynyń VII maýsymy da aıaqtalýǵa jaqyn. Bul maýsymnyń fınaldyq jekpe-jegi "Astana Arlandary" men "Kýba Domadores" komandalary arasynda ótedi. Fınaldyq aıqas 15-shi shilde kúni Astana qalasyndaǵy "Qazaqstan" sport kesheninde bolmaq. Qazaq jurty kóz tikken bul aıtýly básekege bizdiń boksshylar da janyn sala daıyndalýda. maýsymnyń aqyrǵy aıqasy bastalýǵa da sanaýly kúnder qaldy. Osy oraıda "Astana Arlandarynyń" bas bapkeri Nurlan Aqúrpekov myrzany áńgimege tartqan edik.
Qudaı qalasa, bıylǵy jetinshi maýsymdaǵy fınalǵa deıingi aıqastarda súrinbeı, aqyrǵy asýǵa jettińizder. Alda úlken synaq kútip tur. Jalpy, daıyndyqtaryńyz jaıly qysqasha aıtyp berseńiz.
– Ózderińiz bilesizder, aldaǵy bolatyn eki jekpe-jek te 15 shilde kúni Qazaq jerinde ótedi. Reglament boıynsha 24 maýsym kúni biz Kýbaǵa barýǵa tıisti bolatynbyz. Barǵan jaǵdaıda bizge sál qıyn soǵar edi. Óıtkeni, bizdiń birinshi nomerli boksshylar sál sharshady. Onyń ústine ýaqyt pen klımaty basqasha muhıttyń arǵy jaǵyna ushyp barý da bizge qolaısyz soǵar edi. AIBA sheshimimen aqtyq aıqastyń 15 shildege qalǵany jaqsy boldy. Jigitterimiz úılerine baryp, onshaqty kún demalyp aldy. Sosyn, 28 maýsymnan daıyndyqty bastap kettik. Boksshylarymyzǵa barlyq jaǵdaı jasalyp jatyr. Báriniń kóńil-kúıleri de jaqsy. Qudaı qalasa aldaǵy kúnde baǵymyzdy synap, 15 shilde kúni Qazaq boksynyń qaı deńgeıde turǵanyn kórsetemiz dep oılaımyn.
Ulttyq qurmadan keletin kómek jaıly jaǵymdy aqparattar jankúıerlerdi qýantyp edi...
Ulttyq qurama boksshylary jaqynda ǵana Túrkıaǵa baryp, demalys oqý-jattyǵýynan keldi. Ol jaqtan Vasılıı Levıt jaraqatpen oraldy. Soǵan baılanysty ol aldaǵy fınalda bizge kómekke kele almaıdy. Meniń kóńilime qaıaý salyp turǵan osy másele. Óıtkeni, 91 kelide jeńetin jigitterdiń tiziminde Vasıa turǵan edi. Onyń ornyna endi ózimizdiń komandanyń tis qaqqan boksshysy Anton Pınchýkty daıyndap otyrmyn.
Aýyr salmaqta odan keıin úmit artqan boksshymyz Qamshybek Qońqabaev edi. Aýyldaǵy anasy aýyryp, aýyr halde emhanaǵa túsken eken. Soǵan baılanysty ol da Qyzylordaǵa ushyp ketti. Fınal kezinde onyń sharshy alańǵa shyǵa almaıtyny belgili boldy. Onyń ornyna Oljas Buqaevtan ózge laıyqty adam bolmaı tur.
Ulttyq quramadan 75 keli salmaq dárejesi boıynsha Ábilhan Amanqul "Arlandar" sapynda maıdanǵa shyǵady dep estip edik...
Áńgime basynda aıtqanymdaı, bul jolǵy aıqas biz úshin jeńil soqqaly turǵan joq. Ótkende ǵana Astanada ótken Prezıdent kýbogynda Ábilhan Amanqul bir qolynan jaraqat alǵan bolatyn. Jýyqta daıyndyq ústinde ekinshi qolyn da jaralap aldy. Ol da aldaǵy fınaldyq kezdesýde maıdanǵa shyǵa almaıtyn boldy. Aqyry, onyń ornyna Saparbaı Aıdarov shyǵady dep otyrmyz.
Qysqasy, Ulttyq qurama tarapynan bizge kómekke keledi degen senimdi úsh boksshy da joǵaryda aıtqan jaǵdaılarǵa baılanysty Arlandar sapynda sharshy alańǵa shyǵa almaıtyny ókinishti-aq boldy...
Bıylǵy maýsymdaǵy eń qaýipti qarsylas "Kýba Domadores" komandasy týraly qysqasha aıtyp berseńiz.
Kýba komandasy – qazirgi kúnde álemde ataǵynan at úrketin aıtýly komandalardyń biri. Quramynda shetinen yǵaı men syǵaılar, Álem jáne Olımpıada chempıondary, eń kemi Panamerıka oıyndarynyń jeńimpazdary.
Bir tań qalarlyǵy olardyń nomeri birinshi oıynshylary Qazaqstanǵa kelip qansha kezdesý ótkizse de jalyqpaıdy. Olar da "Qazaq boksshylarymen kezdestirip, ekinshi nomerli boksshylarymyzdy bir synap kóreıik" demeıdi. Bizde ótken qandaı kezdesý bolmasyn, únemi birinshi nomerli jigitterin ákele beredi. Eki dúrkin nemese úsh dúrkin álem chempıondary da kele beredi. Alda Álem chempıonaty kútip tur, soǵan qatysatyn boksshylary bizge kelip jaraqat alyp qala ma degen saqtanbaıdy. Kýba – Álem chempıonatynan qoryqpaıdy, Qazaq boksshylarynan qorqady. Olar muhıttyń arǵy jaǵynan joldy aýyrsynbaı, arnaıy kelip, Álem chempıonatyna qarsy daıyndyǵyn bizge kelip pysyqtaıdy. Olardyń bul joly da birinshi nomerlerin alyp kele jatqanyna qaraǵanda, óz jerimizde bizdiń elden jeńisti julyp alýdy maqsat etip te kele jatyr. Sol sebepti men jankúıerlerdiń aldynda jerge qarap qalmas úshin jigitterimdi kúndiz-túni daıyndap, olardy kúnige qaırap, jeńisti qalaıdy qoldan bermeýge jigerlendirýdemin. Ár boksshymen jeke-jeke jumys jasap, daıyndyqty qaıtalaı pysyqtap, qandaı tásilmen jeńý joldaryn zertteýdemin. Aýyr salmaqta Levıt pen Qońqabaevtan ózge Jánibek Álimhan men Ádilbek Nıazymbetovterdiń de jaraqaty qol baılap otyr. Olar alda ótetin Álem chempıonatyna da qatyspaıdy.
Aýyr salmaqtaǵy jigitterdiń jaǵdaıy belgili boldy. Endi orta jáne jeńil salmaqta óner kórsetetin jigittermiz ben onyń qarsylastary týraly aıtyp berseńiz.
49 kelide Temirtas Júsipov. Ol da bizdiń quramadaǵy eń tájirıbeli boksshylardyń biri, Qazaqstan chempıony. Osy salmaqta júrgenine uzaq boldy. Negizinde, 49 keli salmaqta óner kórsetý, bul salmaqty birneshe jyl boıy ustap turý degen óte qıyn. Kez kelgen adamnyń organızmy, denesi ósedi, mysaly, 49 kelide ne bir myqty jigitter shyǵady, sosyn ýaqyt óte kele tulǵasy ósip ketedi de ári qaraı salmaqpen kúresip ketedi. Al Temirtas jasy 30-dan assa da 49 kelide Qazaqstanda teńdesi joq boksshy. Osy jobada komandamyzǵa talaı jeńister syılap, jankúıerleriniń kóńilinen shyǵyp júr. Týra osy jolǵy qarsylasy – Ioanıs Oskar Argılagos Peresti 2015 jyly jeńgen bolatyn. Biraq, ol kezde Peres 17 jasta boldy. Odan beri osy kúnge deıin tájirıbe jınaqtady, Temirtas bolsa eseıe tústi degendeı. Sondyqtan bul jerde Aslanbek Shymbergenov pen onyń qarsylasy sıaqty, tájirıbe men jastyq jalynnyń aıqasy bolmaq.
52 kelide komandamyzdyń kapıtany Oljas Sáttibaev. Bul jolǵy qarsylasy – Iosvanı Veıtıa Sotomen buǵan deıin de 2015 jyly osy jobada jeńgen. Sonymen qatar, ekeýi ózge de halyqaralyq týrnırlerde kezdesken, bir-birin jaqsy biledi. Bul qarsylasy da osal jaý emes, Olımpıadanyń qola júldegeri. Jalpy, bul joly qaı-qaısysyna da ońaı bolmaıdy, árıne. Degenmen, Oljas – namysshyl, jigerli jigit, kishkentaıynan ózimniń shákirtim, qyr-syryn jaqsy bilemin. El namysy synǵa túsken osyndaı qysyltaıań sátterde ózin kórsete alady buıyrsa.
56 kelide İlıas Súleımenov. Ol da kóptegen synaqtardan súrinbeı ótip júrgen tájirıbeli sportshy. Azıa oıyndarynyń chempıony, Olımpıadaǵa qatysqan. Bıyl 52 keliden 56 kelige salmaq aýystyrdy, Qazaqstan chempıonatynyń kúmis júldegeri boldy, sodan beri bizdiń jobada bokstasyp júr. "Arlandar" sapyndaǵy barlyq jekpe-jekterin tek qana jeńispen aıaqtap júr. Sondyqtan İlıasqa artar senim mol. Al onyń qarsylasy Javer Ibanez Dıas ta osal boksshy emes. Degenmen, jeńiske múmkindik bar.
60 kelide kórermenderdiń kóńilinen shyǵyp júrgen jas batyr Zákir Safıýllın. Ol ózine saı stıli qalyptasqan, aqyl toqtatqan, kez kelgen jaǵdaıda ózin kórsete alatyn, óte tájirıbeli boksshy. Buǵan deıin aldaǵy qarsylasy kýbalyq Lazaro Alvares Estradamen kezdesken, teń oıyn bolsa da, jeńis Estradaǵa berilgen bolatyn. Odan beri de ol kóp tájirıbe jınaqtady ǵoı. Sondyqtan Zákirge artar senim mol.
64 kelide Dilmurat Májıtov bolsa ol jas sportshy, osy kúnge deıin kýbalyqtarmen kezdesip kórmegen. Ol da úmitti aqtap júrgen jigit, maıdandy qalaı bastasa, solaı aıaqtaıdy, jyldamdyǵy baıaýlamaıdy. Onyń bul jolǵy qarsylasy álem chempıony – Andı Krýz Gomez.
Al 69 keli salmaqta Aslanbek Shymbergenovke senim artyp otyrmyn. Onyń qarsylasy – Olımpıada chempıony Reıner Iglezıas Sotolongo. Buǵan deıingi bir kezdesýde Aslanbek ony aıqyn basymdyqpen jeńgen. Buryn Sotolongo 64 kelide Olımpıada chempıony bolǵan. Qazir 69 kelige aýysqanymen úlken jetistikke áli jete qoıǵan joq. Álem chempıonatynda qola alǵanymen, byltyr ótken Rıo Olımpıadasynda júldege ilinbeı qalǵan. Onyń da jasy kelip qalǵan, Aslanbek bolsa jas. Sondyqtan aldaǵy kezdesý tájirıbe men jastyq jalynnyń básekesi bolmaq.
Qorytyp aıtqanda, Kýba qabylandary bizdiń Arlandar úshin qubyjyq emes. Buǵan deıingi kezdesýlerde de tas-talqan etip jeńgenbiz. Alla sátin salsa, bul joly da jeńisti jolymyzdy jalǵastyryp, kelesi maýsymǵa qadam basamyz degen senimdemin.
Áńgimeńizge rahmet! Bul shaıqasta "Arlandarymyz qazaq rýhyn kóterip, týymyzdy bıikte jelbiretkeı!
Áńgimelesken, sýretterdi túsirgen Ularbek Dáleıuly
